National Games 2022-ah Mizoram contingent in inelna an hmachhawn tur zawng zawng an hmachhawn zova. Mizoram hian gold medal pakhat, silver medal pakhat leh bronze medal pahnih, a vaiin medal pali la in an hlawhtling viau.
Thawhlehni khan boxer Malsawmtlunga chuan inelna hmachhawn zovin Lunglei boxer hian final a lut a, mahse a vanduai zawkah a tang ta zui.
Mizoram hian inelna chi hrang pakuaah infiammi tirin – Archery(M); Football (W); Weightlifting (M); Boxing (M&W); Judo (M&W); Athletics (Wildcard) (M); Swimming (Wildcard) (M&W); Wrestling (Wildcard) (M); Wushu (Wildcard) (W) – ah te inelna an hmachhawn.
Mizoram contingent Chef de Mission V. Lalzawmliana chuan, “Mizoram aiawhtuten theihtawp an chhuah a, kan thlen chin hi a lawmawm. Hmasawn turin theihtawp kan chhuah chhunzawm leh ang, state dangte elphak turin Mizoram hian theihna kan nei,” a ti.
Mizoram Incentive Cash Award Scheme 2022 ang chuan, gold medal latu Lalhumhimi’n Rs 6,00,000/- a dang ang. Silver medal latu Malsawmtluanga’n Rs 4,00,000 dawngin bronze medal latu Zakhuma leh Lallawmawma ten Rs 2,00,000 an dawng thung ang.
Mizoram tana medal late
Gold Medal:-
- Lalhumhimi, Judo (-52kg)
Silver Medal:-
- Malsawmtluanga, Boxing (Middleweight)
Bronze Medal :-
- Zakhuma, Weightlifting (61kg)
- Lallawmawma, Boxing, Featherweight (54–57kg)