Aizawl: Sialhawk khawtlangin an khuaa zirna luh kum 100 tlin nimin khan an lawm a, he hun hmanpuitu, Deputy Chief Minister Tawnluia’n zirna tel lovin hmasawnna leh changkanna tak tak a awm thei lo tih a sawi.
Tawnluia chuan Pathian hruaina changa Sialhawkah kum 100 chuang zirna kalpui a ni chu khawtlang leh mipuite a lawmpui thu sawiin, a lawmna an buatsaih chuan zirna an ngaih pawimawhzia leh an ngaihsanzia a tilang niin a sawi.
Zirna chu finna leh hriatna bul a ni a, hlawhtlinna leh chanvo tha petu a nih thu sawiin, he hun hmanga zirlai kalkawmte chu dam chhungin zir tur an ni tih chu hre reng chunga a zir thei apiangte tha taka zir a, hlawhtlinna an chan ngei theih nan zirlaite zir uluk turin a chah a ni.
Inkhawmah hian Sialhawka zirna bul tan a nih dante leh hma a sawn zel dan chanchin chu Lawmsanga, Headmaster, Government Sialhawk High School-in a sawi a, centenary thupui thlan, ‘Hmasawnna bulpui – Zirna’ tih sawizauna chu CVL Thanhlua, Asst. Prof. Govt. T Romana College hnen atangin ngaihthlak a ni.
Centenary puala Souvenir buatsaih chu Khawzawl DC CC Lalchhuangkima’n a tlangzarh a, Sialhawk khua atanga zirna kawnga mi hlawhtling Group A hna chelh mek leh chawl tawhte chawimawi an ni bawk.
Sialhawk hi kum 1895 khan Sailo lal, Vuttaia nupui, Neihpuithangi hova a pasal boral hnua din a ni a, 1920 khan Lower Primary LP School din tan a ni a. Covid hripui len avangin a hun takah centenary hi 2020-ah khan lawm a ni thei ta lo va, kuminah lawm a ni ta a ni.