Russian sorkar chuan an awp lai, Crimea leh an ram inkalpawhna lei pawimawh chhe ta chu July, 2023-a siam zo hman ngei turin contractor-te thu a pe.
Tar lan tawh angin he lai hi Inrinni kal ta khan thil puak avangin a chhia a, mi pathum an thi tih thuneituten an sawi.
Russia chuan Ukraine tihah a puh a, Kyiv erawh an tih a nih thu an la sawi lo.
Km 19 zeta thui lei, Europe-a lei sei ber hi Russian sipaiten Ukraine-a an châk lak luhna ber a ni a; mahse, bungraw phur liantham erawh a kal thei lo.
Thil puak hian kawng pali awma pahnih chu a lei velah tak tichhiain a hnuai tuipuiah a tla a, a sira relkawng kal pawh a tichhe bawk.
Tun dinhmunah hian lorry-te chu lawng hmanga phurh kai turin thui tak an intlar a, a kai nan ni eng emaw zat hun sen a ngai.
Lei hi lirthei tenau leh rel tan erawh an hawng leh tawh thung.
Russian sorkarin website-a lehkha pawimawh an daha a lan dan chuan a siam that hna hi company pakhat, Nizhneangarsktransstroy-in an thawk dawn a, an hna hi ‘Crimean Bridge chu a design siama a chhiate siam thata lirthei hman theih tura siam’ a nih thu tar lan a ni.
A siam zawh hun tur hi July 1, 2023 tih a nih thu tar lan a ni bawk.
Lei hi Russian President Vladimir Putin-a’n kum 2018-a a hawn a ni a, a hma kum liah Crimea hi a awp tan a ni.
Crimea khawchhak lam leh Russia chhim lama Taman peninsula pawhtu niin Kerch strait chunga awm a ni a, Putin-a rorelna hlawhtlinna lantirna pakhata ngaih a ni.
Russian president hian Inrinnia beih a nih khan ‘Ukrainian-te firfiak taka an chetna’ tiin a sawi zui a ni.
Tihchhiat a nih hlim khan Ukraine-ah chuan nasa taka lawm a ni a, Kyiv sorkar erawh chuan an inrawlh thu a sawi lo thung.
Russian-te hian phuba lak nan Thawhtanni atang khan Ukraine-a khawpui hrang hrang chu vansang atangin a kap zui nghal a, civil mi an thih bakah an hmun a chhe nasa hle.
Hetih rual hian mi thiamte chuan lei tihchhiat phuba lakna ni lovin, a hma daih tawh atangin nasa zawka Kyiv kah hi an lo ruahman tawh niin an ngai thung.