Nasa taka ruah sur avanga tui lian nasa tak vangin Australian state pathuma chengte chu hmun hima insuan chhuak tura hriattir an ni.
An ram chhung hmun thenkhat chuan ni khat lek chhungin October thla puma ruah an dawn thin zat let li zette an dawng hlawm.
Tui lianin chenna in 500 vel chimin mi pakhat a thi a, mi dang pakhat chin hriat lohvin a awm mek bawk.
Sik leh sa awm dan chi khat, La Niña an tih avanga thleng tui lian hian kuminah Australia-ah mi 20 chuang an thi tawh.
Australia-a mihring cheng tam ber dawttuna state, Victoria chu tun kar tui lian tuar na ber an ni a. Veng eng maw zat chu inthiar chhuak tura tih an ni a, heng zingah hian state khawpui, Melbourne-a mite pawh an tel.
Tui lian hian kawngpui a chim a, sikul khar niin chenna in leh sumdawnna hmun 3,000 chuangin power an nei lo.
Premier Daniel Andrews chuan tuiin a chim in hi an pun zel a rinawm niin a sawi a, an state-in kum tam tak chhunga tui lian a tawrh nat ber tum a nih thu a sawi.
“Tun hi chu a intanna chauh a la ni a, min la chenchilh deuh dawn,” tiin Australian Broadcasting Corporation hnenah a sawi.
Hmun tam tak chuan darkar 24 chhungin ruah an dawng tam hle a, a dawng tam ber chu Melbourne hmarchhaka Strathbogie a ni.
Mm 220 zet dawngin October-a an dawn thin let zet a ni a, London khawpuiin kum khata a dawn thin hmun thuma thena hmun hnih zet a ni.
Tasmania-ah pawh hmun thenkhata ruah mm 400 zet a tlak hnuah lui tam tak a lian a. Chenna in engzat chiah nge a tihbuai erawh hriat a la ni lo.
New South Wales-ah Forbes khuaa mi 600 chuang hmun hima suan chhuah niin chenna in leh sumdawnna hmun 250 cuang tuiin a chim.
He state-ah hian kar tir lamah khan tui lianin a car a lak avangin mi pakhat a thi.
Chhanchhuah hna thawktuten chin hriat loh an la zawng mek bawk.