ZPM President Lalliansawta’n kum 2023-a MLA inthlanpui lo awm turah bial awm zawng chuh kim vek an tum thu sawiin, sorkarna an chang a nih chuan an leader, Lalduhoma chu chief minister tur a nih thu a sawi.
Nimina Aizawl Press Club-a thuthar thehdarhtute a kawmnaah zawhna chhangin he thi hi ZPM president chuan a sawi a. ZPM-in Mizoram hmun hrang hrangah bu an khuar thuk zel nia sawiin, Mizoram chhim lama district council-te pawh an tlawh chhuah thu leh an beisei aia an boruak a that chhoh thu a sawi.
ADC pathuamah hian inthlanpui lo awm turah pawh an beisei a sang hle nia sawiin, ZPM president chuan, “Candidate tur pawh kan nei nualin ka hria,” a ti.
ZPM president chuan nakuma MLA inthlanpui lo awm turah Mizorama MLA bial 40 awm chu chuh vek an tum thu a sawi a, “Tunah hian search committee-ten bial hrang hranga candidate tur an zawng mek a, an duh ang an hmuh fel hunah nomination committee kutah an hlan dawn,” tiin, a thlang turten an thlan fel hmaa mahni thua bial lo vil lawk chu an remti lo niin a sawi.
Lalliansawta chuan an leader, Lalduhoma chu chief ministerial candidate a la nih reng thu sawiin, “Kan lo sorkar thei a nih chuan kan chief minister tur chu Pu Lalduhoma a ni,” a ti.
ZPM sorkar chu a danglam bik dawn tih sawi bawkin, “Kan danglamna tur hi sawi tur tam tak a awm a, kan chief minister turin works department chan a nei ve lo tur ringawt pawh hi kan danglamna lian tak tur chu a ni,” a ti a, department sum tamna chief minister-in an huikhawm ang chi chu an party-in tha an ti ve lo tih a sawi.
Hruaitu an invuah dan – leader, president, working president bakah Val Upa Council chu sawi hlawh mah se hruaitu bawr an invuah danah buaina an nei lo tih a sawi a, “A remchangin a tha hle a ni tih a hmangtute hi chuan kan hria,” a ti.
ZPM president chuan tun thla atangin Vangpui feh chhuah an nei dawn tih sawi bawkin, Mizorama khua zawng zawng tlawh chhuak vek an tum a, a thawh khatna atan district panga – Mamit, Kolasib, Saitual, Khawzawl leh Champhai tlawh turin ruahmanna an siam a, khaw 218 tlawh chhuak turin group 38-ah an inthen a, team member 170 chuang zin turin an inruat tih a sawi bawk.