Lawngtlai district, Rulkual khuaa current siama thawk mi pangate chu current-in a man a, an zinga mi pathum an thi a, pahnihin hliam na tak an tuar bawk.
Rulkual khawtlang hruaituten The Zozam Times an hrilh danin Nilaini khan Rulkual atanga km 4 vela hlaah thing tluin power line a vaw chat a, line chhiatna hi ramhnuai, khawih harsa lai deuh leh ban inkar hlatna lai a nih avangin department lamin khawtlang punin nimin khan power department kaihhruaina hnuaiah hnatlangin power line chhia hi an siam a ni.
Power line chhia an siam mek lai hian current kal thutin, line siama thawk mek mi panga chu manin, an zinga mi pathum – Samuel Lalthianghlima, Lalramdinpuia leh Lalrinchhana te chu a hmunah an thi nghal a; mi dang pahnih – Lalrinenga leh Lalnghawrliana ten hliam na tak an tuar a, Lawngtlai damdawi in panpui an ni.
Thudawnnain a sawi danin Rulkual power line hi Bungtlang ‘S’ power line nena kalkawp niin, Bungtlang ‘S’ power line erawh a tha thung a, Rulkual lam line chhia siam a nih lai hian Rulkual line power chu off ni mah se Bungtlang line lama power kal nen khawi emaw laiah a lo intawk palh a nih an rin thu P&E Deptt. lam chuan an sawi a. He thu buatsaih lai hian Rulkual lam line-a power a kal dan chiah hi hriat chian a la ni lo a ni.