UEFA Europa Conference League-ah Fiorentina in knockout stage lut turin an dinhmun an siam a. Scottish club Hearts lakah goal nga khungin 5-1 in an chak.
Ningani zana Florence a Stadio Artemio Franchi a inkhelah Italian team tan first half-ah Luka Jovic, Cristiano Biraghi, Nicolas Gonzalez leh Antonin Barak ten goal an khung.
Robbie Nelson-a pawlte tan Stephen Humphrys chuan goal khat second half tan tirah a khung a. Mahse goal li a an hmahruaina dah kir leh turin Gonzalez bawkin second half-ah penalty atangin an goal hnuhnung ber a khung.
He result avang hian Fiorentina in knockout stage khelh an hnaih tawh a. Lehlamah Hearts in beiseina la nei mahse Istanbul Basaksehir leh RFS te an la hmachhawn leh turah an hneh ve ve a ngai tawh.
Inkhel dangah West Ham United in vawi li ah vawi li hnehna changin knockout stage an lut chiang.
London Stadium-ah Hammers tan Said Benrahma leh Jarrod Bowen ten goal an khung a, 2-1 in Belgian club RSC Anderlecht an hneh.
England forward Bowen hian club chanchin a Europe huap inelna a goal khung hnem record a siam a. Johnny Byrne leh David Cross ten goal ruk ve ve an khung chu a nihrual mek.
David Moyes-a pawlte hi knockout stage atan tling chiang tawh mahse an hmabak khelh hnih atang point khat an hmuh belh leh chuan round of 32 khel lovin round of 16 atan an tling chiang nghal thei dawn.