English club pahnihten Europa League-ah goal khat khung ve ve in hnehna pawimawh an chang a. Knockout stage luh tumin ke an pen chhunzawm.
Old Trafford-ah Manchester United in Cypriot club Omonia Nicosia an mikhual a. Hneh tak maiin nawr tam mahse goal an khung thei lo rei hle.
Huntawp dawnah substitute Scott McTominay chuan an tan danglamna a siam a, goal pawimawh khungin an hrilhhai tur a dal hlauh.
Tun thla tirah Omonia mualah team pahnihte inkhelin United chak mahse an khingpuiten an lakah goal hnih an khung thei. Old Trafford-ah erawh mikhual team in goal ven an dah pawimawh a, dah pawimawh lo thei pawh an ni lo.
United in hneh taka nawrin an inkhelh chhungin goal hlauhawm vawi 34 an insiam thei. Heng zingah vawi 12 hi goal zawnah kalin Omonia goalkeeper Francis Uzoho chuan 11 a dang a, a hnuhnung ber a dang thei ta bik lo.
United tan forward Marcus Rashford chuan chance tha vawi thum a hloh a. Midfielder Casemiro chuan crossbar pet perin tauh goal teuh a nei bawk a. A hnampui Fred pawhin goal a khung teuh.
United manager Erik ten Hag chuan, “He team-ah hian hlauhawm siam theihna leh goal khung theihna nasa tak a awm. Mahse hengte hi a lansarh theih loh chang a awm thin. Zanin kha tiang hun chu a ni.”
“Mahse thil lawmawm tak chu goal a lut thei lo chungin team a beidawng lova, a tawp thlenga beidawng miah lova an thawhrah chu an seng a ni. Kan result-ah ka lawm a, kan team tanrualna a tha a. Player 11 khelmual a awmte chauh ni lovin kan team pumpui in fak an phu. Hetianga khelh theih hi chakna pakhat a ni a, kan mamawh tel.” tiin inkhel zawhah a team a fak hle.
Bodo/Glimt hnehtu Gunners
Arsenal in Europa League knockout stage an hnaih tawh hle a. Norwegian club FK Bodø/Glimt lakah an mamawh goal khungin 1-0 in hnehna an chang a. An dinhmun tichiang turin vawikhat chak bak an mamawh tawh lo.
Aspmyra Stadion a inkhelah Gunners tan kheltha tak midfielder Albert Sambi Lokonga thawhrah sengin Bukayo Saka chuan inkhel a goal awmchhun a khung.
Bodo/Glimt hi tunhnaiah mahni mualah Europe huap inelna a record nei tha an ni a. An club tantu thawm ring takin tiphur bawkin Gunners hi na takin an nawr ngam. Goal hlauhawm nei nual mahse a hmawr erawh an bawk thei lo thin.Amahl Pellegrino leh Runar Espejord ten goal an khung teuh.
Gunners boss Mikel Arteta chuan, “An khelmualah a zawnin game 14 an chak tawh a, a awlsam dawn lo tih kan hre sa. An team an kheltha hle a, chutihlaiin keini in inhliam neuh neuh avanga team kan thlak danglam avangin harsatna kan nei ve thung.” tiin an team inkhelh dan a sawifiah.