Rajasthan-a kumtlinglo unau mipa pathum ruk bo zinga pahnih ruang chu Delhi-a Mehrauli-ah hmuh a ni a, an unau dang pakhat erawh chhanchhuah a ni hlauh thung.
He thil thlengah hian mi pahnih man an ni tawh a, naupangte hi tlanna sum uma an ruk bo ngei thu leh pahnihte pawh hi an thah a nih thu an sawi.
Police chuan unau thum – kum 13 mi Aman, kum riat mi Vipin leh kum ruk mi Shiva te hi October 15 khan Rajasthan-a Alwar atanga ruk bo niin he mi ni vek hian Delhi panpui an ni a, an chuanna thlawhnaah pawh an hming hmuh theih a ni.
A tukah a ru botu pahnih, Mahavir leh Manjhi chu hriat chhuah an ni a, naupangte pa, Gyan Singh biain tlanna sum Rs. nuai 10 an phut.
Police hian phone-a a pa an biakna chu chhuiin rinhlelh pahnih chu an man ta a, Rajasthan atanga an ruk ngei thu leh Delhi-ah an hruai a, Mehrauli-a ram hnuaiah pahnih an that tak thu pawh an sawi a ni.
An inpuan hnuah hian Delhi leh Rajasthan Police chuan mi pahnih hi hruaiin ram hnuai an dap zui a, Aman leh Vipin te ruang chu an hmu ta a ni.
October 15 khan a naupang ber, Shiva pawh police hian an hmu tawh a. Ram hnuaiah hian a rutute hian darkar khat chuang a unau dangte nen hian phuar hlawma an dah hnuah nikhua a hre lo va, an thi vek emaw tiin ram hnuai atang hian an kalsan a. A harh leh chuan kal chhuakin police-in an hmu ta a ni.
Police hian Rajasthan atanga unau thum ruk bo zinga a naupang ber a ni tih an hriat hnuah children’s home-a enkawl zui turin an dah lailawk ta a ni.
Police chuan Shiva ute pahnih hi phuar hlawm an ni ngei tih an sawi a. An thih chhan tak erawh post mortem report a chhuah hnua hriat theih a beiseiawm tih an sawi.
A rutute pahnih hi Bihar lam mi ve ve niin an ruk bote chhungkaw chenna bul lawk, Bhiwadi, Alwar-a cheng thin an ni a. Ruihhlo ngai an ni a, Mahavir-a hian mobile phone zawrhna tenau neiin Manjhi-a hi thil siamna hmuna thawk niin police chuan an sawi.