Lunglei district Congress committee (LDCC)-in “Mizo Engineer te mawhpuh hmain Bhavya company au eih hmasa phawt turin Lunglei ‘N’ MLA kan phut” an ti.
Lunglei North bialtu MLA Dr Vanlaltanpuia’n Mizo Hnam run Lungleia MNF chhung inkhawma a thusawi, MNF Sub. Hqtrs Lunglei thuchhuaha an tarlanah Lunglei khawpui chhung kawng siamna tur Rs. nuai 590 MNF sorkar-in dahfel tawh anga a sawi leh Lunglei by-pass road hna bultanna tur Congress sorkar-in Rs. vbc 10 a lo dah tawh engmahlo anga a sawi chu a zahtheihloh thlakin Lunglei mipuite hmusit naa an ngaih thu LDCC chuan an sawi.
LDCC chuan “Lunglei khawpui kawng siamtha turin sorkar hian contractor thlang fel tawhin work order pawh an pe ngei a, amaherawhchu, kawng siamna tur sum hi MNF sorkar hian nei lovin central lamah special assistance a dil mek chauh” an ti a. “Contractor chu ama sum hmanga lo thawk mai tura tih a ni tih hi Dr. Tanpuia MLA hian a hre pha ve lo nge, hre reng chungin Lunglei mipui bum nan dawt a sawi” an ti.
“Dr. Vanlaltanpuia sawi anga Lunglei khawpui kawng chhe lutuk siamna tur Rs. nuai 590 chu MNF sorkarin a dah a nih takzet chuan hnamdang ni lo, Mizo contractor an thlan fel tawh hnenah sum chu pe thuai turin LDCC chuan kan ngen” an ti a. “Hetihrual hian Lunglei by-pass road hna bultanna tur Rs. vbc 10 hi khawiah nge an dah a, engatannge an hman tih hi sawi chiang zawk law law turin MNF kaihhruai sorkar hi a phut a, engmah thamlo an tihfo hi an fanghma no ei zo vek em ni tih hi kan zawhna a ni” an ti bawk.
LDCC chuan “Kawng chhiat lutuk avanga chhim lam mipuiten harsatna nasa tak kan tawh mek laia YMA thahnemngaihna a lo lanchhuah tak avanga an sorkar hlima Congress kaihhruai sorkar sum hman bang hmanga kawng tha reilo tak an siam ve, mipui laka kawng chungchanga insawi mawina hi Dr. Tanpuia leh MNF sorkar hian tiri fo ngam tur an ni lo” an ti a. “Bhavya company lakah engvanga huaisen taka aw chhuah thei lo nge an nih, Lunglei North bialtu MLA ngei hian MLA a nih tan tirh a ‘ka bial chhungah hna chhia a awm tur a ni lo’ a tih lai te kha a va la rei lo em, hei bak baka hna chhia leh tlo lo hi a awm thei dawn em ni?” an ti.
“Khawiva kawng siam tura tih te hi khawiahnge tender an chhuah, khawi pawisa in nge hna an thawh dawn tih hi sawi chiang law law sela, MNF sub.Hqtrs Lunglei lu pawh a tihai deuh lo maw tih hi LDCC ngaihdan a ni” an ti bawk a ni.