Aizawl : All Nagaland College Students Union (ANCSU) intawhhkhawm ni 5 awh tur, Sakus Mission college, Dimapur-a neih chu nimin khan Mizoram sorkara Sports & Youth Services Minister Robert Romawia Royte-in a hawng.
Robert Romawia Royte chuan kum 2010-2017 thlenga Nagaland sorkar leh NECS thawhdunna avanga NECS DPR hrang hrang siamte hmanga state budget pawn atanga sum tam tak hailuh a ni leh sorkarin duh taka NECS a rawih avangin lawmthu a sawi a. “Nachang hriatna hmangin sorkar pawhin hlawhtlinna a chang thei tih tichiangtu a ni” a ti.
Naga te chu tribal dangte aia hnam politics a harhchhuak hmasa nia sawiin, British-in India a awplai kum 1929 daih tawhah Naga Club-in Simon commission hnenah British sorkarin India a chhuahsan ruala Naga te mahnia ro inrel ve nghal an duh thu memorandum puitling tak an lo thehlut daih tawh tih Robert Romawia Royte chuan a sawi a. India sorkar pawhin tih tak zeta rilru pea Naga mipui pawmpui thlap inremna an neih theih ngei chu a duhsakpui thu a sawi.
Nagaland-in kum 30 hnua under-17 Subroto Cup-a an champion pawh a lawmpui thu Robert Romawia Royte chuan sawiin, “hei hian Naga te theihna a pholang a, football leh sports discipline dangah pawh duailo thin Nagaland in kawng thar a zawh tanna tur a nih a rin thu a sawi bawk.
ANCSU leh NSF ten sports competition lian an buatsaih thin fakawm a tih thu pawh Robert Romawia Royte chuan sawiin, “National Education Policy 2020 angin zirna in zawng zawng pawhin sports an kalpui vek a tul chho mek a, he education policy document-ah ngei hian ‘sports’ tih thumal hi vawi 30 lai a inziak” a ti a. Sorkar leh zirna in enkawltu ten sports an namnul thiang tawh lo tih sawiin, sports chu co-curricular education a ni tawh lova, education a ni tawh tih a sawi bawk.
Sports hmasawnna tura Mizoram sorkar hmalakna thenkhat sawiin, Robert Romawia Royte chuan kum 2019 atanga Mizoramin sports policy mumal tak a neih tawh thu leh chumi zul- zuia Mizoram sorkarin sports chu industry nihna a pek tawh thute, chumi avanga sports-ah hmasawnna tam tak a thlen mek thute leh sports lama Mizoram sorkar hmalakna dang te a sawi.
Aizawl FC chungchang pawh sawi tura an ngen avanga sawiin, Naga zinga AFC licence nei hmasaber Coach William Koso chu Aizawl FC atangin a nih thu leh Naga zinga I-League player hmasaber Thopi pawh Aizawl FC atangin a nih thu a sawi a. Arunachal Pradesh leh Tripura atanga I-League khel hmasaber te pawh Aizawl FC chhulchhuak an nih thu a sawi bawk a ni.