Netflix chuan kumin thla ruk chhung customer a loh zut zut hnu ah July – September khan chhungkaw maktaduai 2.4 in an pun belh ta a, lawmna tur a ngah chho dawn e.
Khawvelpum huapnga eizawnna leh khawsakphung harsatna vanga sum leh pai indaih lohna tihkiamna tura Netflix pawh tawh loh mai chu thutlukna awlsam tak a nih vangin hemi hun chhung pawh hian company hian a hloh nasa hle.
Amaherawhchu, show hit tak tak- Stranger Things leh Monster: The Jeffery Dhamer Story chuan viewer te nasa takin a hipkhawm leh ta a, an hmangaih hmasa hnenah an kirleh mek.
Netflix-in thuchhuah a siamah, “Kum chanve chhung kha chona namen lo a tih theih awm e. Tunah chuan hmabak eng tak neiin, hmasawnna kawng dika kan zawh chho leh tawh a ni,” an ti.
Heti ang zela an kal chuan subcriber an pun belh zel an ring. Tun dinhmunah Netflix hian customer maktaduai 221 chuang neiin, streaming lian ber nihna a chelh mek.