Politician hlun, Mallikarjun Kharge chu India-a eptu party lian ber, Congress party president tur atan thlan tlin a ni ta.
Kharge-a hi MP chanchin ngah ve tak, Shashi Tharoor-a nen an inkhing a; mahse, a khingpui vote hmuh zat let riat zet hmuin hneh taka thlan tlin a ni.
Nilainia Thawhtannia vote tlate chhiar zawh hnuah a chak ta lo zawk chuan Kharge-a chu lawmpuiin, “Vawiin atang hian kan party siam tharna chu a intan ka beisei,” a ti.
Tun tum hi kum 20 chuang zet hnuah Gandhi chhungkaw mi ni lovin an kaihhruai lehna tur a ni a. A hnuhnung ber, Sitaram Kesri-a kha kum 1998 khan kum nga hun atana thlan ni mah se kum hnih hnu lekah paih thlak a ni.
Prime minister hlui, Rajiv Gandhi-a thihsan tak, Sonia Gandhi-i’n Kesri-a ai hi awhin kum 19 zet party president a ni zui a. A fapa, Rahul Gandhi chu kum 2017 khan chuhtu awm lova thlan tlin a ni a; mahse, kum hnih hnu lek, kum 2019-a inthlanpuiah an chet chhiat em avangin a mawhah lain a bâng zui a. Heta tang hian Gandhi-i bawk hnawn leh niin inthlan a awm hma zawng a lailawka party chief nihna chelh tura tih a ni.
Gandhi chhungkaw tana mi rinawm tak ni kumkhua, Kharge-a hi inthlan chuh tura sawi rik a nih atangin mi tam zawkin tling tura an rin sa a ni.
Union minister hlui, Kharge-a hian an party chhung inrelbawlna leh kalhmang tam tak thlak a tiam a, heng zingah hian party chhunga eng level-ah pawh a zahve chu kum 50 hnuai lam hnena mawhphurhna pek pawh a tel.
Kum 80 mi ni tawh, Kharge-a hian mawhphurhna a lak atangin hna a thawh mawlh mawlh a ngai dawn a, inthlanpui lo awm leh tur hmain thla 18 awrh chauh a awm tawh avangin mi thiamte chuan Congress party-in Prime Minister Narendra Modi-a leh BJP el pha tur chuan siam that an mamawh hle niin an ngai.
Mi thiamte chuan tunah hian an party chuan ‘chanvo neitute inkhaidiat dan, inawp leh inrelbawl dan leh pawl thuthlungah’ an chhiat leh derthawn lai ber an tawng mek niin an ngai a. Hei vang hian party chief thar tan hna a tam hle niin an ngai a ni.