Tunlai hian police leh thuneitu dangten Myanmar atanga Mizoram kaltlanga dan lova nungcha tawlhruk an man hnem hle a, court thupek angin nungchate chu Aizawl Sahuanah dah an ni a. Sahuana ramsa awm sa aia tam dah luh tawh niin, a enkawl kawngah thawktute an buai a, sahuan hmunhma pawhin a zo tawh lo.
Aizawl Zoological Park enkawltute chuan dan loa nungcha tawlh ruk mante chu court thu pek angin Aizawl Sahuanah dah zel a ni a, tun dinhmunah nungcha tawlh ruk man, chi hrang hrang 325 an enkawl mek thu The Zozam Times an hrilh.
Nungcha mante dahna bik (enclosure) an neih loh thu sahuan enkawltute chuan sawiin, “Enclosure bik kan nei loh avangin a remchan dan ang angin an dahna tur (cage)-te siam chawpin tunah hian enkawl mek an ni,” an ti.
Tun dinhmunah chuan chung nungchate chu la enkawl thei mah se man belh a awm a, dah luh belh tur a tam chuan a dahnaah an buai dawn a, harsatna an tawk viau thei tih an sawi a; heng nungchate dahna tur siam dilna chu forest department hotute hnenah an thlen tawh thu an sawi.
Sahuan enkawltute chuan heng ramsa mante hi sahuan tlawhtute tana hmuh theih turin eng emaw zat chu an dah chhuah tawh thu an sawi a, “A dahna tur bik hi nei tam ila chuan mipui hmuh theih tura dah chhuah vek kan duh a, mipui hmuh châk tur pawh a awm nual,” an ti.
Ramsate hi Mizorama awm ngai lo, ram dang nungchate an nih hlawm avangin dimdawi pawh an ngai hle tih an sawi a, tunah chuan an remchan ang ang ei tur an pe tawp rih tih an sawi a ni.
Tun dinhmunah Aizawl sahuanah hian range officer uapna hnuaiah thawktu mi 21 an awm mek a, kar tin Thawhtanni atanga Inrinni thleng mipui tlawh theih turin zing dar 10 atang tlai lam dar 3 thleng hawn thin a ni a, sorkar chawlhah pawh hawn an ni a, Pathianni erawh khar a ni.
Aizawl sahuanah hian Central Zoo Authority (CZA)-in a pawmpui ramsa chi hrang hrang 188 enkawl mek a ni.