Aizawl: MNF President Zoramthanga, chief minister chuan, “‘Pathian leh kan ram tan’ tia mi sang tam tak thisena baptist tawh MNF party hi kan hnuchhawn thiang lo,” a ti.
Nilainia Aizawl North II Block MNF huaihawta Ramhlun Indoor Stadium-a block conference hmanpuitu MNF President Zoramthanga hian, “Pa ber feh haw tur chuan chhungkaw mamawh kan zawh tawk tur dapin thahnemngai takin thlawhhma kan suar tluan thin a. ‘Pathian leh kan ram tan’ tia mi sang tam tak thisena baptist tawh MNF hi kan kalsan thiang lo a ni,” a ti.
ZPM leh Congress party chungchang sawiin Zoramthanga hian, “A hram atang chuan sakeibaknei emaw tih mai tur kha, sabengtung bawk a lo ni leh thin a. Congress pawh central leh state-a sorkar kawp, zu chhiah la bawk chunga sum harsatna kan tawh nasatziate kha mipuiin an la theihnghilh lo a. Tun dinhmunah Congress chu sawisel pawh a inthlahrunawm lek lek tawk zawk a ni,” a ti bawk.
Inthlanpui lo awm leh turah Pathianin bul a tanpui, beih ngaihna pawh an hriat tawh loh MLA tha tak takte avangin an sorkar leh ngei dawn tih sawiin Zoramthanga hian, “Hun khirh tak hnuaiah, cheng vaibelchhe tam tak kan hmuh tur ang kan hmu lo chung pawha nghei lo leh buai lutuk loa kan awm thei hi Pathian tanpuina avanga sorkar hmalakna chak tak vang a ni,” tiin, Pathianin kawng chanveah a kalsan dawn lo tih a sawi.
Khualzahawm, K. Vanlalvena, MP pawhin thu sawiin, “Tun sorkarah rinlawk loh leh beisei lawk hauh loin hri leng, ramri buai leh thenawm rambuai avangin harsatna lian tak tak kan hmachhawn a. Chuvang chuan kan hotuten an intiam ang leh an sawi angin an awm thei lo a ni,” a ti.
A pian hman ve hmain MNF chu mumal taka kal tawh, MNF movement avanga hnam dangin kawng hrang hranga Mizote chimralna tura humhim a nih thu a sawi a. MNF chuan mi harsa leh tanpui ngaite an hre zel dawn tih sawiin, a mi mal hian mi hausa leh thiltitheite a tlawn ngai dawn lo tih a sawi bawk.