Aizawl : Social Welfare Minister Dr. K. Beichhua chuan nimin khan New Delhi ah NITI Aayog Vice Chairman Suman K. Bery an kawm.
Social Welfare Minister Dr. K. Beichhua hi SEDP Bamboo Development Board Vice Chairman Dr K. Pachhunga’n a tawiawm a, NITI Aayog Vice chairman hi NITI Aayog member dangten an tawiawm a ni.
An inkawmnaah hian Mizoram hmasawnna tur hrang hrangte sawi ho a ni a. NITI Aayog member te chuan State sorkar department hrang hrangte’n anmahni kaltlanga hma an lak dan turte leh anmahni kaltlanga hmasawnna project te theh lut thin turin thurawn an lo pe nghal bawk.
Dr K Beichhua chuan India ram district 112 zingah Mamit District chu Aspirational District-a dah anih avanga Central sorkarin duhsak taka hmalakna a kalpui chu lawmawm a tih thu a sawi a. Chhim lam district pahnih – Siaha leh Lawngtlai-te pawh kawng hrang hrangah district dang aia la hnufual zawk an nih avangin Aspirational District te enkawl anga a bika enkawlna pe turin a ngen nghal.
Dr K Beichhua hian Chief Minister Zoramthanga lehkha ziahsak leh ama lehkha ziah a theh lut nghal bawk.
Siaha leh Lawngtlai district a bika enkawlna pek chungchang hi ngun taka sawiho a nih hnuah NITI Aayog Vice Chairman Suman K Bery chuan an thil thlente chu an lo ngaihtuah nawn tur thu a sawi.
SEDP Bamboo Development Board Vice Chairman Dr. K. Pachhunga pawhin Mau atanga thil chi hrang hrang siam chhuah lama Mizoramin hmalakna kalpui a tum chu NITI Aayog ah a lo thlen tawh thu sawiin, member-te nen sawi ho a nih hnuah a rang lama bawhzui a, tan nghal ni se tiin an rel.
Minister Dr. K. Beichhua hi Dr K. Pachhunga bakah Social Welfare Secretary Arun Mishra leh official dangte’n an tawiawm.