Arsenal in UEFA Europa League knockout stage a an hmun an tichiang a. Granit Xhaka hmanga goal khungin PSV Eindhoven laka 1-0 a chak chu an tan a tha tawk.
Emirates Stadium a hnehna an chan avangin Group A-ah Mikel Arteta pawlte hi point nga in an fal a. Europa League-ah khelh li atang la chak vekin group stage atangin an tling chiang tawh a. Eng round atangin nge an khelh tan dawn tih erawh a la chiang lo.
Gunners hian karleh a Netherlands a PSV khelmuala an inkhelh leh hunah point an hmuh belh hrim hrim chuan round of 16 atangin knockout stage an khel tan ang.
He hnehna hi Arsenal in inelna hrang hranga vawi 8 a zawna hnehna an channa a ni a. Inkhelh hun sawnhlat a ngai avangin an buai lova, an squad siksawina remchang an neih phah.
Khelmual chhungah erawh team pahnihte an inkhel tawk angreng hle a. Mualneitu lamin chak tumin an bei a, chutihlaiin PSV lam pawhin point hmuh tum takin an bei.
Gabriel Jesus leh Bukayo Saka ten Gunners tana chance tha an nei a, mahse PSV tan Argentine goalkeeper Walter Benitez a che tha hle.
Second half-ah erawh minute 70-naah Swiss international Xhaka chuan Takehiro Tomiyasu ball cross chu goal-ah a pet lut a. He goal hi hnehna chan nan a tawk a, goal dang a luh belh lo.
Fiahna paltlang Gunners
Tun season-ah Arsenal an che tha tluang a, league leh Europe huap inelna lamah chetsual an la nei mang lo. Result tha an nei thei zel fova, hei vang hian an fans te beisei a sang. Chutihrualin khelh tur a tam chhoh zelin an tlo tawk dawn lo nia ngaitu an awm ve bawk.
Ruud van Nistelrooy-a hnuaia attacking football khel thiam PSV hi September 15 a London a inkhel tur hi an ni a, mahse Queen Elizabeth II thihna avangin sawn hlat a ni.
Europa League bika Gunners in fiahna an paltlang khauh ber tum a la ni a. Arteta pawlten fiahna an paltlang.
PSV in attacking football khel lovin an inven a ngai ngun a, Arsenal hian ball thunun zawkin goal hlauhawm an nei nual a, a hmawr erawh an bawk hleithei lo.
Gunners in chance vawi 25 an insiam zinga vawi ruk chu striker Eddie Nketiah hloh a ni a. English forward goal hmaah a che fuh hleithei lo.
Saka leh Jesus te pawhin huntha an neih an hloh leh thin bawk.
Lehlamah erawh PSV goal nawr tur an veng hneh. Rawlthar beiseiawm Xavi Simons chuan ‘risk’ la a vawi hnih a pet tih loh chu goal shot mumal an nei lova. An forward rinrawl Cody Gakpo pawh Gunners in an dahtha hneh viau.
Arsenal manager Mikel Arteta chuan, “Team tha tak kan thunun thei a, tha tak taka ball han inpek vel pawh kan ngah. A tawp erawh kan khar tha lo leh thin. A hmawr bawkna turah pass sual emaw pet that tawk loh a awm leh thin. Mahse kan chak hi a lawmawm a, tlin hi a pawimawh ber chu a ni.” tiin a sawi.