Aizawl: Mizoram Pradesh Congress Committee Media Department chuan MPCC President Lalsawta’n Aizawl East II bial a enkawl laia a hnathawh hrang hrang an tlawh a, he bial chhunga veng hrang hrang tana rotling (asset) zawng zawng deuhthaw chu an president hnathawh a nihzia a takin an hmu niin an sawi.
An thuchhuahah MPCC Media Department hian Aizawl East II a bial chhungin Lalsawta hian MLA fund piah lamah veng hrang hrang hall leh auditorium te, inkalpawhna leh lei te bakah mipuiin an hman tangkai em em Aizawl Bazarpuite pawh sak that a nih theih nan hmalakna thui tak a nei hman tih sawiin, “NEDP sum atangin Rs. nuai 3,641.59 lai ruahmanin bul tan a ni a, kum li a ral hnuah pawh MNF sorkar hnuaiah a hlawhtlinna hmel hmuh tur ala awm mumal lo. Pu Lalsawta hun laia sak, New Market Building tharah tawt takin thil zuartute an inhnawh mek a ni a, hei hi Congress Party chuan pawi a ti tak zet a ni,” an ti.
MPCC Media Department-in a tar lan danin Aizawl East-II bial an tlawh pah hian bialtu MLA, sports minister ni bawk, Robert Romawia Royte-in hnathawh a tum, lungphum a phum tawh thenkhatte an en tel bawk a. “MLA inthlan dawna a intiamnate chu a tihlawhtling tha lo hle a, bial chhung inkalpawhna thenkhat phei chu MLA a nih hnua khawih danglam la ni miah lo ang mai a zawh tlak loh hialte pawh a awm a ni,” an ti bawk.
MNF ministry chu an kalna apiang a awlsam taka lung phum mai thei, a tak taka hnathawh hmuh tur awm leh si lo an ni tih sawiin MPCC Media Department chuan, an hnathawh tura an sawi tam tak chu romei zam, kal hnaiha bo leh thin ang maia beisei bo an ni. Sorkarna an siam leh a nih chuan Tuirial Hydel Project leh Falkawn Referral Hospital an lo tihhlawhtlin tawh ang bawkin MNF sorkarin lung a phum, tihhlawhtlin ngaihna an hriat lohte tihhlawhtlin vek an tum tih an sawi.