BJP Mizoram Thalai chuan nimin khan thuchhuah siamin Vairengte leh Sairang inkar kawngpui zauhna tura ram laksakte zangnadawmna pe thuai turin Mizoram sorkar an phut thu an sawi.
Kolasib District Land Owners Association-in NH 6 & 306 laihna tura sorkar laipuiin sum a pek vek tawh zangnadawmna tun thlenga an la dawn loh avanga lungawi lohna lantir nana kawngpui an dang chu pawi an tih thu an sawi a. Prime Minister Narendra Modi kaihhruaina hnuaia India ram state hrang hrangah hmasawnna a zuan mek laiin Mizoramah erawh hmasawnna rahbi lo thleng tur tithuanawp leh tikhawmuang lui tlat chunga state sorkar a kal chu pawi an tiin, lungchhiatthlak an tih thu an sawi.
BJP Mizoram Thalai chuan ram neituten an thil ngiat, zangnadawmna dawng tura an nawrna hi an thlawp tlat thu an sawi bawk.