Aizawl : National Students’ Union of India (NSUI), Mizoram President RB Lalmalsawma’n Kolasib district land owners association-in an chanvo tur an la chan loh avanga Mizoram luhka an dan avanga zirlai tangkhang tangkhang ten harsatna an tawh theih te an pumpelh theihna tura hma la turin Kolasib Bawrhsap a ngen.
NSUI, Mizoram President chuan nimin khan Kolasib Bawrhsap John LT Sanga biain, kawng danpin avanga zirlai tangkhang ten harsatna an tawh theih te an pumpelh theihna tura hma la turin a ngen a. NSUI, Mizoram pawhin zirlai tangkhang te tan theihtawp an chhuah tur thu a hrilh.
Kolasib district land owners association te zangnadawmna dawn tur chu kumin July khan competent authority for land acquisition leh NHIDCL joint account-ah dah vek a nih tawh niin NSUI, Mizoram chuan an sawi a. Heti chunga kawng siamin a paltlang tura ram neitu ten harsatna an la tawk chu pawi an tih thu sawiin, ram neitute harsatna chu sorkarin chinfelsak thuai se an duh thu an sawi bawk.