William Gallas-a chuan Arsenal defender William Saliba chu Real Madrid pan theihna hun tha a hmu a nih chuan hnar harsa a tih a rin thu sawiin, French defender hian Spanish club lian chu Arsenal aiin a thlan zawk tur thu a sawi.
Arsenal defender hlui rin dan chuan Real Madrid hian Saliba hi lak luh an tum a nih chuan Arsenal chhuahsan a châk ngei a rin thu a sawi a. France defender hian London hmar veng a pan hnuah khawvela centre-back tha ber berte zingah a inhlangkai a. Saliba hi Arsenal tlar hnungah Gabriel Magalhaes nen an thawk dun tha hle a, tlar hnung tiphui tha ber pawla sawi an ni.
A khel tha thei bawk a, season liam taa Mikel Arteta nauten Premier League nomawi an lak theihna chhan pawimawh tak a ni.
Saliba hian kumin kum tir lam khan kum 2030 thleng atan contract thar ziakin Arsenal-ah hun rei zawk hmang turin thutlukna a lo siam tawh a. Mahse, Gallas-a chuan Spanish club lian panna tur kawng a inhawng a nih chuan a hnar theih a ring lo a ni.
Gallas chuan Santiago Bernabeu-a luh theihna hun hlu a inhawng a nih chuan Arsenal player tan chuan hmasawnna sang zawk thlentu a nih a ring tlat tih a sawi.
“William Saliba hi Real Madrid-in lak luh an tum a nih chuan a hnar theih ka ring lo. Chutianga hnar turin Arsenal hian an thleng sang em ni?” tiin a sawi.
“Mi tam tak chu ka thil sawi avang hian an thinrim ang tih ka hria; mahse, club pahnih, Real Madrid leh Arsenal te chanchin kan sawi a nih chuan Real Madrid chu Real Madrid a ni tlat. Thil dang daih an ni,” a ti.
Arsenal captain hlui hian a sawi zelnaah, “Ka ngaihdan chuan tun hnaiah an che tha ber lo a ni emaw, tun hnaiah trophy lian an chawi lo a nih emaw pawhin Madrid chu Madrid a ni a, Madrid panna hun tha hmu thei player chuan pan an tum ngei ngei ang tih ka hrilh a che u. Chutianga an ti a nih pawhin dem rual an ni lo. Saliba pawhin chutiang thutlukna chu siam ta se a dem theih loh ang,” a ti.