November 24 atanga December 4, 2026 inkara Guwahati, Assam-a khelh tur, Senior Women’s Inter Zonal T20 Trophy-a North East Zone aiawha khel turin Mizo nula pali leh assistant coach tur thlan a ni.
India-a cricket thuneitu, Board of Control for Cricket in India (BCCI) hnuaiah hian zone paruk awmin North East Zone-ah hian state/association paruk a awm a, heng atana zone aiawh tur player 15 leh coaching staff-te chu Ningani kal ta khan North East Zonal Selection Committee thukhawmin an thlang a ni.
North East Zone-ah hian Meghalaya, Arunachal Pradesh, Manipur, Mizoram, Nagaland leh Sikkim an awm a. Heng atanga zone aiawh tura Mizo thlan chhuahte hi batter Vanlalruatpuii, Tlangnuam, Aizawl; bowler pahnih, Lalhriatpuii, Armed Veng, Aizawl (spinner) leh ZD Lalnunhrili, Venghnuai, Aizawl (medium) leh all rounder Lalnunmawii, Damdiai te an ni.
Mizoram atang hian player pali bakah assistant coach atan R. Lalhlimpuia (Tetea), Ramhlun North, Aizawl thlan a ni bawk a. Tun tumah hian hmarchhak zone-a state tel paruk zingah Mizoram hi player thawh tam ber a ni a, eng level-ah pawh Mizoramin player a la thawh tam ber tum a ni bawk.
Thlan chhuahte bakah hian eng emaw harsatna tawh palh avang khel thei lo an awm thuta koh theih tur (stand by player) panga zingah Vanlalremtluangi, Zemabawk, Aizawl a la tel cheu bawk.
Mizoram atanga hmarchhak aiawh tura thlan chhuahte hi Mizoram team tana thawh hlawk tak tak an ni hlawm a. Tun hnai lawk pawh khan Senior Women’s T20 Trophy (Plate) khel zo chauh niin final an lut nghe nghe a ni.
Tournament khelh tan hma hian hmarchhak aiawhtu turte hi inbuatsaih nan RBDCA Cricket Ground, Nongkhrah, Ri-Bhoi, Meghalaya-ah November 16-21 chhung an camp dawn a, camp hi Sikkim Cricket Association-in a thlen tur a ni thung.
Senior Women’s Inter Zonal T20 Trophy-ah hian zone parukte an inkhelh kual chhuah hnuah a sang pahnihin December 4, 2026-ah final an khel dawn a ni.
North East Zonal Selection Committee thutkhawmah hian Cricket Association of Mizoram (CAM) atangin Hony Secretary Lalfakawma Varte leh Women’s Selection Committee Chairman Daniel Lalrinsanga Hmar te an tel a ni.
CAM chuan North East Zone aiawh tura thlan player leh coach a chhuangin duhsakna a hlan a ni.
NORTH EAST ZONE FIXTURE:
Nov. 24, 2026 – North East Zone vs South Zone
Nov. 26, 2024 – Central Zone vs North East Zone
Nov. 28, 2026 – North Zone vs North East Zone
Nov. 30, 2026 – North East Zone vs East Zone
Dec. 02, 2026 – North East Zone vs West Zone