- Lallunghnema, Charuty Lodge
Ka article chhuak hnuhnung berah khan thil leitute chanvo chi hrang hrang thupuia hmanga live discussion neiha kan thusawi tlangpuite ka rawn tarlang tawh a. Chhiartute zinga mi engemaw zatin bengvarthlak an tih thu pawh ka dawng nual. DDK live discussion kan neih kha darkar khat chhung zet a ni a; hun kan nei tha tawk a, vanneihthlak ka ti hle. Min kaihruaitu Pu Andrew-a a zei bawkin mi thiam a ni a, a inchhiar zauva, a nuamin a man hla hle in ka hria. Kha live discussion kha thlirtu(viewer) an tam hlein ka hre bawk. Amaherawh chu minute 20 vel hun kan la nei tihah thil danglam deuhvin min tlakbuak ta thut mai kha a ni a. A pawi hle a ni.LP Gas connection leh delivery chungchang ka sawi dawn lai takin ka partner, ka thianpa khan zun ram thiar a duh thu ding chung meuhvin a sawi ta tlat mai! Min va surprise teh reng em! Mahse, ka insiam rem thuai a. Ka thusawi chu ka chhunzawm leh mai a. Discussion hlawhtling tak kara thil thleng danglam tak khan boruak a ‘stall’ deuh a ni. Live telecast a nih tlat avangin viewer tam tak zingah ‘kut rang’ an lo tam si a. Chu video clip chuan Zoram dung leh vang a chiah hneh viau a ni ang. Hmun hrang hrang hrang atangin whatsapp message ka dawng hnem hle. Ka kalna, ka thlen chin apiangah “Pu Hnem, hmanni zan kha in va che tha ve, in va sawi tha ve, i thianpa kha a insum zo lova nih kha mawle, a pawi en mai! I che tha lutuk, I che mawi lutuk, I puitling hle mai, I hmuhnawm tawp” tia min lo comment tu tawk lah bo hek suh. Lar dan tha nge, lar dan tha lo, ka hre hek lo. A chang chuan zahthlak tihna lai ka nei det. Ka thianpa kha a che mawi lo, a che nalh lo, mahse, tuisik bawhnu ruh theih loh ang a ni. Mahse, heti zawng hian ngaihtuah rawh, Consumer right mualphopui tu a ni tih hi. Hepa hi alawm tun hnaia Air ticket refund na tura inpe chu. A inpekna hi a ropui teh mai a nia!
Inthiar duh au thawmin min tibuai deuh det hnu khan hetiang hian ka thusawi chu ka chhunzawm a. LP Gas hi Home Delivery a tih vek tur a ni. “Gas a lo thleng,” tia au au tawh tur kan ni lo. Mahni in lum ngeiah Gas kan la tawh tur a ni. College Vengah Home Delivery an ti mek. A hlawhtling lutuk. In Vengah, Kan Vengah kan ti ve tawh tur a ni, ka ti. Home Delivery hi Changkanna leh Hmasawnna a ni. Concrete building leh motor changkang leh Gas la tura intlar hi a inhmeh mawlh lo. He ka thusawi hi beng nei chuan lo hre rawh se. Zawm pawh zawm ngei se, ka ti! Gas Agent pawhin a theih tih hriain hma la lul rawh se.
Zun chhuak drama buaipui hman kan ni tawh lo. Consumer phurrit leh tuarnate hi i buaipui tawh zawk ang u, kan ti a ni. Zei taka awm a, changkang inti taka khawsak hi hmasawnna a tling lo. Consumer Right hriatna kawnga hmasawnna hi hmasawnna dik tak chu a ni. Tute chet chhiatna emaw lo thlira lo nuihpui chiam chiamho hi mi ropui tak an ni ang em? tih hi ka inzawhna a ni fo tih hi ka sawi duh bawk. Suit (kawrchung leh kekawr colour ) ha chunga Gas put vu vu te hi thil inhmeh lo ber zinga mi a ni. Kha zun ram thiar duh a kha mi a fing a ni lo. A tiawm lo kei pawhin ka ti. Mahse, he ka thianpa hian Consumer problem a buaipui nasa hle tih hi ka sawi duh bawk. A hrim hrimin changkanna a ni zawk. Zei taka Sawrkar pawisa eiru thin ho hi kei Eva-i Pu hian ka haw hluah hluah zawk a ni. Consumer Protection vei lo, hmasawnna tak tak vei lo, mipui Chanvo vei lote hi kan mamawh lem lo a ni. Chetsualna video khan rah tha chhuah mawlh rawh se. Thil tha thlen mawlh rawh se.
Tin, heti hi a ni a, kan thupuia kan dah ang hian tun hnaia consumer thenkhat hlawhtlinna hi ka han pho chhuak dawn a. Ngun takin lo chhiar ang che u. Thawnthu sawi angin kan sawi ang.
Tlemlai deuh khan kan thianpa Kamlova chuan Room Cooler pakhat Rs.14000/- man vel a lei a. Vanduaithlak takin rei an hman hmain a chhia a. A zuartu Sumdawngte hnenah an report a. A tirah chuan, ‘Kan lo siam ang e’ tiin an inthlah a. Mahse thla hnih, thum hnuah pawh an siam sak that theih lawk loh avanga he Pu Kamlova hian an harsatna tawh dan min hrilh a.
Theihtawp chhuahin ka han umzui sak a. Warranty period chhung a nih chuan a thlawnin insiamsak thuai tur a ni a. In siamsak theih loh chuan a thar in pe mai tur a ni. A thar in pek theih loh fo chuan bungraw man hu pawisa in refund leh mai tur a ni, tiin dawrkaite hi ka va hrilhsak a. A tawi zawngin sawi mai ila, cooler zuartute hian cooler chu a thlawnin an lo siamsak a ni. An lawm ve ve hle. Consumer leh seller te hi tha taka thawkho tur kan ni. He cooler zuartute pawh hi an fel ka ti khawp mai. Hetianga Sumdawngte hi mipuiin kan mamawh hle a ni. Sumdawng thenkhat zingah an customer te ngaihssk ngai reng reng lo hi a sang a sang an awm laiin Smart Business Enterprise hi a za tel an awm ve tho a ni. Dawrkai tam tak chuan cash memo an ziak duh dah hle a. Manufacturing date te, expiry date te, maximum retailed price te an tarlang tha duh lo fo. Warranty period pawh an tarlang lo fo bawk. A eng a pawh chu lo ni se, consumer te hi sumdawng leh dawrkaite tan hmuh theih Pathian an ti thin. Keini hian thil leitute hi kan lo hmusit fo thin a; chhiahhlawh enin kan lo en thin a. Vanduaithlak tak a ni. Mizote u, harh rawh u.
Nula fel tak pakhat a awm a, a hming chu Rachel Khiangte a ni. Goa atangin a nute parcel pakhat a thawn a. Post office a thlen chuan item te chu a lo bo nual a. He thu hi min hrilh veleh kan buaipui a. A bungraw bo man hu pek kir leh a ni. Heng thil te tak te hlu tha si hi kei ve hian ropui ka ti a, ka han pho chhuak a ni. I tan kan ding a, laklawh zun ram thiar a ngai tawh lovang.