BJP Mizoram Pradesh President Vanlalhmuaka chuan mi rethei leh mipui mamawh pek hi an hna pawimawh ber leh an din chhan a nih avangin Mizoramah pawh BJP hi an sorkar ngei dawn niin a sawi.
Nimin an party pisa-a chhung inkhawmah thu sawiin BJP chu hmasawnna kawng zawhtu leh hnathawktu party an nih thu sawiin, “Mizorama sorkarna chelh tawhte anga mahni hlawkna mai ngaihtuah thin party kan ni ve lo a ni,” a ti.
Vanlalhmuaka hian BJP sorkarna state-ah hmasawnna a kal mup mup a, inkalpawhna kawng tha tak thingtlang lo nei mite leh kuthnathawktute eizawnnain a chhawr tangkai siam a nih thin thu a sawi.
Lawngtlai district chhung Rulkhua khuaa P&E department thawktu mi pathumte an hnathawh laia electric-in a man avanga thihna leh nimin maia Lawngtlai AOC venga mi Francis Rochungnunga, electric a siam laia nunna a chân ta chu pawi an tih thu leh thi chhungte chu BJP Mizoramin an tawrhpui thu a sawi a. Mawhphurtu P&E officer te chu hrem tur leh, P&E minister chu a mawhphurhna a ni tih hriaa bang ngam tur leh chief minister Zoramthanga kaihhruai sorkar in thi chhungte zangnadawmna a pek ngei an phut thu a sawi bawk.