Kuhva ro – engtinnge ni zel ang?
Kuhva ro tawlh avanga kan ram tawrhna, mipui manganna authawm a ring em em a. DC meuhin kuhva ro hal, khawthlang lamah kuhva phur motor mipuiin man, kan social media zawng zawngah kuhva chungchang, kan CM in Assam sawrkar hotu hnenah a thlen tih vel chu ngaihthlak ninawm khawpin a tam reng a. Kuhva ro man thawm erawh a la awm reng bawk a. A mantu erawh police ni lovin mipui lam zel an la ni bawk.
Kuhva ro tawlh avangin kan thenawm state Assam lamin min hmu khaw lo a. Kan kuhva thartute pawhin an hralhchhuah theih loh phah a. Office kal tur dan, total bandh an siam a, mahse a sawt bawk si lo.
Heng buaina kan mipuite tawrh meknaah hian sawrkar nei lo ang maia kan awm hi a manganthlak a. A kaikuang chhui a hun a. Thuneituten chhui mai tura kan beisei laiin thawm a awm lova. Tunge hma la ta ang?
Mipuiin hma la tura kan beisei ber sawrkar a chet loh chuan a dawt leh chu dan lo a chete lakah mahni duh dana chet ve a ni ber mai a. Chutianga dan lova rorelna chu kan ramah hian a thlen kan phal dawn em? Kan duh taka kan thlan tlinte hian he ram manganna hi an maimitchhin san zel a nih chuan ram hmangaihtu tia inchhal ngam chi an ni hauh lovang le.
Sorkar hian theihtawp bakah theihna zawng zawng hlan chungin he kuhva ro tawlh chungchangah hian hma la se la, mipui chet ngai lo hian a tul anga dan leh thupek kengkawh ngam chungin che mawlh tawh teh se.