Kolasib District Land Owners Association-in zangnadawmna phuta lungawi lohna lan tir a, Vairengte daia kawngpui an dan chu Inrinni, November 5, 2022 tlai khan an titawp a, November thla chhung sorkar an ngaichang dawn.
Vairengte atanga Kawnpui inkara kawngpui siamna atana ram lak tur neitu intelkhawm Kolasib District Land Owners hian, chawlhkar kalta Ningani (November 3, 2022) atang khan Mizoram chak lak luhna kawngpui ber Vairengte-ah state pawn atanga lirthei lo lut tur reng reng dangin lungawi lohna an lan tir a ni.
Inrinni khan kawngpui dan chungchangah Central YMA chuan sorkar ngenna angin palai hna thawkin Vairengte an pan a. Hun eng emaw chen an inkawm hnuah kawngpui dan avanga mipuiin harsatna an tawh chhoh mek dan te, ram neitute harsatna chu sorkarin a hriatpui tawh thu leh an harsatnate sukiang tura theihtawp chhuahpui an inhuam dan te, he harsatna hi a ching fel thei tur ni lo mah se an tlan chhiatsan loh tur thu te an sawi hnuah Land Owners hruaitute chuan, YMA ngenna chu zahawm an tih avangin kawngpui an dan chu tihtawp an rel ta a ni.
Kawngpui dan tihtawp chungchangah The Zozam Times zawhna chhangin Land Owners Chairman Lalmalsawma Ngente chuan, “Central YMA ngenna kha a zahawm kan ti em a, kawngpui dan kan kalpui mek chu kan titawp ta a ni. Amaherawh chu, tun thla (November) chhunga sorkar lam atamnga thu thar lawmawm ang chu a awm lo a nih chuan, a aia nasa zawka hma kan la a nih pawhin kan inhrethiam ang chu kan ti,” a ti.
Lalmalsawma Ngente chuan, vawiina chief minister hoa Mizoram chhunga National Highway siam mek chungchanga sorkar thuneitute an thutkhawmna turah hian, Vairengte atanga Kawnpui inkara ram laksak neitute zangnadawmna chungchang sawihonaa a tel chiah dawn em tih an hriat loh thu a sawi.