MPCC President Lalsawta chuan, “Inthlana sum chakna hi kan thah loh chuan ram rorelnaa sum hman dik lohna hi a nung reng ang,” a ti.
He thu hi Inrinnia Serchhip bazar-a MPCC Campaign Committee ruahman anga Serchhip Block leh Serchhip Joint Block Congress Conference leh mi thar lawm luhna hun buatsaihah MPCC President hian a sawi a. Nakkum inthlan hun atana party-te inpuahchah dan a inang dawn lo hle tia sawiin, “Sum hmanga sorkar tum ten an zia an chhuah dawn. Inthlana sum chakna hi kan thah loh chuan ram rorelnaa sum hman dik lohna hi a nung reng ang,” a ti.
Dik lohna ata ram chhan tur hian kum khat chhung lek sum hmanga thlemna laka inthiar fihlim a ngai tih sawiin Lalsawta hian, Congress party member te leh mipuite chu inthlan hautak lo leh sum hmanga inthlan thianghlim lo an hnualsuat theihna turin tun atanga tanin, candidate an neih hunah pawh sum hmang loa chak tum turin a chahin, chu chu Pathian, Kohhran, MPF leh ECI te duh dan a nih thu a sawi a. Sum hmang tam loa Pathian chakna zawk an rin ngam chuan suma rinna nghattute hi an hneh dawn tih sawiin, sorkar thianghlim, viak tha leh mipui hmangaihna ram siam hi thil harsa a nih loh thu leh, dik loa hausak hi malmak a, mamawh neih tlem a tawk tih a sawi.
Lalsawta hian sorkar tha a awm chuan loneitu, kuthnathawk, thawh tur nei lo thalaite hian eizawnna ngelnghet an nei dawn tih a sawi a. Congress party Manifesto tlangzarh tak ‘Tang Puihna’ hmang hian Mizoram hi mi taimate dinchhuahna rama siam an tum thu a sawi bawk.
MPCC President hian Serchhip bial hmasawnna thlen tur leh Lal Thanhawla hnathawh chhunzawm turin R Vanlaltluanga an sawm tih sawiin, amah kaltlangin Serchhip bial hmasawnna hna hi Congress party in a thawk zel dawn niin a sawi.
Serchhip Block Congress Committee President Lalramnghaka Kawlni kaihhruai inkhawmah hian MPCC President Lalsawta’n mi thar eng emaw zat an party-ah a lawm lut a. MPCC Vice President Lal Thanzara, MPCC Treasurer Zodintluanga Ralte MLA, VL Robiaka President, ADCC leh PC Laltlansanga te pawhin thu an sawi bawk.