India hmarchhak state 8-a NSS volunteer te intawhkhawmna tun thla ni 8 thleng awh tur -North East NSS Festival- chu Inrinni khan Govt. Kolasib College-ah Sports & Youth Services Minister Robert Romawia Royte-in a hawng.
Sports Minister chuan NSS-ah kum engemawzat volunteer leh hruaitute a lo neih ve thin thu sawiin, Mizoram state NSS hmalakna chu rampum ang pawha zahpuiawmloh tak a nih thu a sawi a. Mizorama pawl hrang hrang zinga a mamawhte tana thisen pe hnem ber NSS volunteer-te an ni pawh fakawm a tih thu a sawi.
Hmarchhak state NSS volunteer te chu social media hman chintawk thiam tur leh thil tangkai atan chauh hmang thin turin Sports Minister chuan a fuih a. “Nun hlawhtling nei tur chuan harsatna leh chona hrang hrangte a eng zawnga thlir thiam mi nih a pawimawh” a ti.
Robert Romawia Royte chuan thalaite chu tumna mumal tak nei tur leh a tihlawhtling tur chuan tih tur leh ngaihpawimawh hmasakte felfai taka thliar hmasa thin turin a chah a. NSS thupui, mahni aia midangte dah hmasakna chu a taka nunpuitu nih tum zel tura chahin, Mizoram chu tlang ram mawi tak, zin mite tana tlawh tur hmun nuam tak tak awmna state a nih avangin state pawn atanga lo kalte chu an chhungte leh thiante hruaia Mizorama zin leh ngei turin a chah bawk.
Kumin April atanga Inrinni thleng khan Mizoramah NSS blood donation vawi 67 a awm tawh a, thisen unit 3510 an pe tawh.
North East NSS Festival-ah hian Nagaland, Tripura, Assam, Sikkim, Manipur, Arunachal Pradesh, Meghalaya leh Mizoram atangin NSS volunteer 300 vel an tel a ni.