Manchester City striker Erling Haaland chu substitute bench a thuttir a nih hnuah chakpuitu ni tura dah luh a ni a. Huntawp dawnah penalty khungin tlem zawk Manchester City in 2-1 in Fulham an hneh.
Inrinni zana Etihad Stadium a inkhelah hian minute 85-naah Haaland-a’n penalty atang goal a khung a. City tan a vawi thumna atana champion an tumna kawnga result pawi tak ni thei tur chu a siamtha.
Norwegian striker hian tun season-ah league goal 18 a khung der tawh.
A awlsam lo
Pep Guardiola pawlte tan inkhel awlsam tak a ni dawn nia ngaihna a lian hman a. Haaland-a an chawlh hahdam tir zanah striker thar dang Julian Alvarez chuan goal hmahruai a khung.
City in goal khung belh tumin an nawr chhunzawm an tum a, an tum ang erawhin thil a kal lo. Minute 26-naah Fulham forward Harry Wilson a foul avangin Joao Cancelo hnawhchhuah a ni a. Referee Darren England chuan penalty pe in Andreas Pereira chuan goal-ah a khung.
Fulham in goal hlauhawm mumal an neih chhun a ni a. Tam zawk an ni chung pawhin inkhel an thunun hleithei lova, City goal lamah hlauhawm an siam thei lo.
A tawpah erawh chak phu zawk an chak a. Bench atang Haaland an dah luh hnuah a tauh goal pawmsak a ni lo phawt a. Mahse Antonee Robinson penalty chawi erawh chiang takin a khung.
Kum 22 mi striker chuan, “Penalty pet dawn khan ka zam ve hle. Ka inkhelh chhunga ka la zam ve ber tum a ni ang. Huntawp dawna penalty, chak theihna tur hi chu a pawimawh a tawh hle. Mahse hetiangah chuan chetsual loh a paiwmawh ber a, ka pet dan tur takin ka pet a, huntawp dawna chakna goal khung kha ka lawm hle.”
“Kar khat chhung ka inhliam avangin bul kan tan thei lova, mahse hetianga hnehna chan hi ka lawm a, kan tan a pawimawh.” a ti bawk.