Hachhek bialtu MLA Lalrindika Ralte chuan a bial chhung leh Mizoram khawthlang lama kuhva chingtute’n kuhva rah hralhna kawnga harsatna an tawh chungchangah hma la turin nimin khan Prime Minister Narendra Modi hnenah PMO Application PMINDIA kaltlangin memorandum a theh lut.
Memorandum a theh luhah hian Lalrindika Ralte hian, Hachhel bial chu Mizorama kuhva thar chhuak tam ber a nih thu tar langin, a bial mipui zaa sawm sarih bawr vel (70%) zet chuan kuhva chinga ei zawng an ni tih a sawi. Tun hnaiah Myanmar atanga kuhva ro lut nasa chu Union Home Ministry meuh inrawlhin dan loa kuhva sumdawnna chu titawp turin Mizoram leh Manipur sorkar a hriattir chung pawhin, kuhva kuhva tawlhruk ti tawp tura Mizoram sorkar hmalakna chuan beisei a pha lo hle a, dan lo a kuhva sumdawnna hi vawiin thlenga tihtawp a la nilo tiin a tar lang.
Lalrindika Ralte chuan, Assam sorkar chuan Myanmar kuhva an state chhunga lut tur chu khauh takin an veng ve mek bawk a. Hemi an venna kawngah hian Mizoram chhunga thar kuhva rahte chu Myanmar atanga lokal anga ngaia an dan avangin, Mizorama kuhva chingtute chuan an kuhva chin an hralh thei ta lo nia sawiin, Myanmar atanga kuhva tawlhruk titawp tur leh Mizorama kuhva chingtute’n an kuhva rah tharte an hralh theihna’na hma lak sak turin a ngen a ni.