Aizawl: December 1, 2022 atangin Aizawl Municipal Corporation (AMC) huamchhung leh district khawpui zawng zawngah ei rawngbawlna gas dahsak/pek (LPG home delivery) kalpui a ni dawn.
May 5, 2019 atangin LPG home delivery hi enchhin nan AMC area huam chhunga veng pali-ah kalpui tan a ni a. Tunah hian veng 29 ah kalpui mek a ni.
LPG home delivery ruahmanna hlawhtling taka kalpui a nih theih nan IOCL hotute, LPG distributor te, local council hruaitute, NGO aiawhte bakah consumer aiawhte’n tum eng emaw zat an inrawnkhawm tawh a. May 2022 pawh khan hemi chungchanga inhrilhhriatna he’ng vengah te hian IOCL leh Mizoram Consumers’ Union te nen tanghoin Directorate of Food Civil Supplies & Consumer Affairs chuan an kalpui bawk.
Home delivery chungchangah hian Ministry of Petroluem & Natural Gas-in Liquified Petroleum Gas (Regulation of Supply & Distribution) Order 2000 dated 26.04.2000 a chhuahin a sawi angin, a mawhphurtu sorkar enkawl Oil Company phalna la hmasa loin distributor tumahin an hnena consumer inziak lutte hnenah home delivery a ti lo thiang lo a; mahse, hemi atan hian state sorkarin an ram leilung awm dan leh distributor te kal kualna tur ngaihtuah chungin, home delivery atana consumer ten pawisa an chawi belh tur a tuk thei a ni. Hemi zulzui hian Mizoram sorkar chuan distributor ten home delivery atan consumer te hnen atangin a man pangngai baka Rs 70 dang an lak belh thei ang tiin a ruahman a ni.