AZL: ZPM party Leader Lalduhoma’n ZPM party chu Brig. T Sailo hmathlir tihhlawhtlin duh te awmna tur nia sawiin, Brig. T Sailo ngaihpawimawh em em power chungchang leh six basic needs kengkawh zeltu leh a tipuitling thei tur awm chhun chu ZPM a nih thu a sawi.
Nimina ZPM party chhung inkhawmah he thu hi ZPM party Leader Lalduhoma chuan a sawi a. Brig. T Sailo zirtirna pawma, a hlawhtlin duh tak takte chu ZPM-a awm tura a ngaih thu a sawi.
Lalduhoma chuan tawngchhe tinrengin an chhiatna turin, dik leh diklo pawh dawn chang lova beihna an tawk mek nia sawiin, “heng hi kan tan malsawmnaah a la chang thei a ni” a ti a. ZPM chu an thang zel nia sawiin, “min beitute beihlet hi a tul ber lo, Pathian i ngaichang ang u” a ti.
Sorkarna chang tura an thawhrim a tul thu Lalduhoma chuan sawiin, party dang zawng zawng aia an thawhrim a tul thu a sawi a. Pathian malsawmna dawng tlaka rim taka thawk tura party mi te sawmin, “mi aia kan thawhrim chuan Pathianin mal a sawm ang a, kan sorkar ngei ang tih hi ka ring tlat a ni,” a ti bawk.