MBJP-in mi rethei lu chunga vaivut pawh it-ah MNF sorkar puh
BJP Mizoram Pradesh thupuangtu K Laldinthara chuan, MNF sorkar chu miretheite lu chunga vaivut pawh itah a puh.
Thawhtanni khan Aizawl Press Club-ah thu thar thehdarhtute kawmgin K Laldinthara hian, Mizoram sorkarin 2011 Socio Economic and Caste Census (SECC) behchhana sorkar laipui atanga a pek tur mi rethei in sakna tur tanpuina Pradhan Mantri Awas Yojana (PMAY) a pek danah nasa takin a khawih chingpen tih sawiin, “Party mi induhsakna atan hmangin in sak tanpuina hi an lo inpe a ni,” a ti.
K Laldinthara chuan, mi rethei in sakna dawng tur tur thlan dan a fel loh avang hian, kum 2011-a list amite pawh insakna tur pek zawk an ni thei lo a, an pek chhun angte pawh 1st instalment chauh peka 2nd instalment la pek lohte pawh an tam thu leh, state dangte chuan phase II an kai tawh tih sawiin, “A nihna tur ang takin insakna tur hi sem nisela, Kum 2012 hnu lam a mite tan pawh sem leh theih reng tawh a ni,” a ti bawk.
Sorkar laipuiin PMAY kaltlanga in sak tanpuina dawngtu hnenah lawmpui/hriatpuina lehkha an thawn zingah lehkha dawng si, a taka insak tanpuina dawng hauh si lo thahnem tak an awm niin a sawi.
He scheme atana pawisa lo kalte hi central sorkar chuan state sorkar hnenah a hlan fel vek tawh a, a nihna tur angin state sorkarin a dawngtu turte hnenah a pe lo mai zawk nia sawiin, “Kan hrawn mek MNF sorkar hian ‘mirethei lu chunga vaivut pawh a it ta’ ni berin a lang,” K Laldinthara’n a ti.
BJP Mizoram thupuangtu chuan, hmanni lawka central minister hnena central atanga insakna tur pawisa lo kal zaa 40 hman a nih chauh thu hriattir a ni kha pawi an tih thu a sawi a. He scheme hlawhtlinna tura pawisa la hman loh zaa 60 chu in nei lo/sak that ngaite hnena rang taka pek chhuah ngei an phut thu a sawi.