Central YMA leh Mizoram State AIDS Control Society (MSACS) te thawhdunnaa HIV/AIDS do kawnga hmalakna ‘Zoram harh rawh campaign’ hnuaia Branch YMA te Mizo hnam lam leh zaia inelna buatsaih turin district hrang hrang an inbuatsaih chho mek.
He inelna district level-a buatsaih tur hian district hrang hranga Bawrhsap te kaihhruaiin committee din niin, he committee hian hma an la chho mek a. Inelna bakah HIV/AIDS laka himna tura hriat tur pawimawhte inhrilhhriatna hun atan he inelna hi hman tura ruahman a ni.
District level-a inelna buatsaih a nih hnuah kumin December ni 1 (World AIDS Day)-ah State level-a inelna Aizawlah buatsaih leh tura ruahman a ni a. Hriat theih chinah Lunglei leh Kolasib district-ah chuan Zoram Harh Rawh Campaign-a branch YMA te inelna hi tun thla ni 15-19 ah neih a ni dawn a. Champhai leh Mamit district-ah tun thla ni 17&18 ah neih a ni ang.
Zoram harh rawh campaign – district level-a branch YMA te inelnaah hian lawmman pakhatna Rs. 50,000; pahnihna Rs. 30,000 leh pathumna Rs. 10,000 ruahman a ni.
He inelnain a tum ber nia sorkar thuchhuahin a tarlan chu – Mizorama HIV darh zel tur ven kawnga mitinte mawhphurhna hrilhhriat thar leh; Ram leh hnam chhan nan HIV laka in vengzo, mi hrisel leh taima ramin a mamawh zia thalaite zirtir; HIV do kawnga hmanraw awm sa te mitinin tangkai taka an hman thiam theihna tura zirtirleh HIV do kawnga hmalaknate mitinin an pawm thiam theihna tura zirtir te a ni.