Premier League table chung berah Arsenal an kir a. Chelsea nen inkhelin Gabriel-a goal khung hmangin 1-0 in away hnehna pawimawh an chang.
Pathianni zanah Stamford Bridge-ah London club pahnih an insu. Season bul tan tha leh la chak tluang Arsenal in fiahna lian leh hautak an tawng a, an mamawh result neiin an paltlang.
Gunners hi inkhel a goal hlauhawm mumal taka siam thin zawk team niin mikhual team mah nise an hlauhawm zawk.
Gabriel Martinelli leh Gabriel Jesus ten huntha an neih chu goal-ah an khung thei lova. Mahse Gabriel Magalhaes inlarin minute 63-naah Bukayo Saka corner pet Chelsea in an pet chhuah theih loh chu goal-ah a thai lut.
Lehlamah Chelsea in tun nipuiah Arsenal duh loh striker Pierre-Emerick Aubameyang an lalut a. Gabon striker hi an tlarhma ah a hawihai thei hle. Goal hlauhawm a ke atanga a chhuah loh mai bakah ball a khawih mang lova. Chelsea hi Premier League match li chhung chak nei lovin an awm mek.
Arsenal boss Mikel Arteta chuan, “Team naupang tak kan ni a, mahse puitlin kawng nasa takin kan zawh. Hetiang ang team tha laka result nei hi hmalam penna lian tak a ni.” a ti a.
Hmalam thlirin league title inchuhna boruak zawhna chu, “Manchester City in kum ruk chhunga an lo tih thin tawh chu tunah an chhunzawm. Khawvela team tha ber an nei a, coach tha ber in a hrual. Team tha tak lakah zaninah hetianga kan inkhelh vang hian an tih ang hi la ti ve thei kan ni tih rinna kan tuh mek.” tiin a chhang.
Salah hovin Reds
Liverpool in tun season-ah Premier League a away hnehna hmasa ber chang turin Tottenham an hneh a. 2-1 in an chak.
Tottenham Hotspur Stadium-ah forward Mohamed Salah chuan first half-ah goal hnih a khung a. Nottingham Forest leh Leeds United laka an tlawm hnuah chak hmel an hmu ve leh.
Liverpool tan minute 11-naah Darwin Nunez ball siamsak atangin Salah chuan an goal hmasa zawk a khung a. Halftime hma deuhin Eric Dier-a ball tauh sual chu an goal hnihna atan a khung ve leh.
Spurs in tlarhmaah inhliam Son Heung-min an chhawr thei lova. An striker rinrawl Harry Kane chuan second half-ah goal khat a khung.
Liverpool boss Jurgen Klopp chuan Mohamed Salah fakin, “Tun season-ah kan la che fuh thei lo chung pawhin Mo hi a hlauhawm reng a. Chance a neihin a vanduai leh thin. Hengte chu tu chungah pawh thleng thei a ni a, zaninah goal hnih a khung hi kan lawm.” a ti.