Animal Husbandry and Veterinary department hotu ten Vawk pul hri African swine fever (ASF) leng mekin ziaawm lam a pan thu sawiin, a reh thawkhata an ngaih thu an sawi.
Nikum bul lama Mizorama leng tan ASF avang hian Vawk sing 5 chuang a thi tawh a, hemi avanga Vawk suat pawh sing 3 dawn a tling tawh. Hetihlai hian tunhnaiah ASF vanga Vawk thi an awm tawh lo.
The Zozam Times zawhna chhangin Vety hotute chuan, ASF leng chu a zia zel a, a reh thawkhatah an ngai tih a sawi a,”Case a awm meuh tawh lo a, reh diak chu a la ni lo a, mahse a reh thawkhat,” an ti.
ASF leng chu zia awm deuh angin lang mah se fimkhur a la ngaih reng thu vety hotute chuan an sawi a, hri chu leng leh hluai thei reng a ni a, fimkhur reng a ngai tih an sawi.
Vawk pul hri leng hian Mizoram a chenchilh tawh tih Vety department hotute chuan sawiin, hemi avang hian hluar leh palh thei reng a nih thu an sawi thung.
Nikum bul lama ASF hri leng avanga Vawk leh Vawkte 33,000 chuang a thih hnuah December thla tawp lamah khan a reh tawh anga ngaih a ni a. Kumin March thla bul khan he Vawk pulhri hi a leng nawn leh a. Thawhtanni thleng khan Vawk leh Vawkte 11153 a thi leh tawh a. Vawk pulhri darh zel tur ven na’n Vawk 10924 zet chu suat a ni leh tawh bawk.