PC party President Vanlalruata’n “Mizoram sorkarin Serlui ‘B’ small hydel project a ngaihsaklo leh political party dangin hydel project siam an ngaihsak lo” tiin, pawi a tih thu a sawi.
PC party pisa-a thuthar thehdarhtute kawmin he thu hi Vanlalruata chuan a sawi a. Tun thla ni 2-ah an party hruaitu dang te nen Serlui ‘B’ small hydel project leh Bairabi dam project an tlawh thu leh khawl leh thil dang cheithat ngai a tam thu a sawi.
Serlui ‘B’ chu kawlphetha megawatt 12 siam theihna, khawl pathum, megawatt 4 zel pechhuak thei awmna a nih thu PC President chuan sawiin, khawl pakhat chu chhe deuh rengin khawl 2 deuh chauh chu hman a nih thu a sawi a. “Khawl chhia chu siamṭhat ni se tun aiin power kan hnianghnar thei,” a ti.
Vanlalruata chuan “Fur ruahtui tlak nasat hle lai pawha a khat thei lo leh tunah pawh tuikhuah a khat lo nasa chuan enchian ngai a awm zia a tarlang” a ti a. A hmuna thawktute chu ngaihsak leh dinhmun ṭha zawka hlankai an ṭul hle nia an hriat thu leh heng hi sorkarin a ngaihsak tawk loh vang nia sawiin, “Mizoram sorkar hian ngaihtuahna tak tak hmanga Serlui ‘B’ hi a enkawl a ngai a ni,” a ti.
Bairabi dam project chungchang pawh sawiin, Vanlalruata chuan “He project hi Mizorama power project liantham kan neih zinga kan state pual liau liau awmchhun a ni” a ti a. Forest clearance leh Environment clearance neihna awmchhun, a hmuna hmalak tawh, ruahmanna hmunah tui a khuah ngam tih finfiah tawh awmchhun a nih thu a sawi.
PC President chuan Bairabi dam project chu kawlphethaa indaihlohna phuhru tura bawhzui tul an tih thu sawiin, “He project kalpui tur hian sorkarin a duh phawt chuan state budget atanga hmalak theih a ni” a ti a. “NLUP, SEDP atana an sum dah zat aia tlem dahin a khuah theih reng” a ti bawk.
Brig. T. Sailo six basic needs buaipuitu awmchhun party an nih thu PC party chuan sawiin, “Brig. T Sailo hmathlir hrang hrang te zinga kan ram mamawh hnukpui ber Bairabi hydel project khuah chhunzawm tuma policy a nei awmchhun chu PC party chauh hi kan ni” an ti.
Political party pakhata hruaitu pakhat chu an policy-a tel si lova six basic needs leh Bairabi tuikhuah chungchang vei bera insawi thinah PC party chuan an puh a. PC party mi leh sa leh Zoram mipuite bum tumah puhin, “Pu Thena Bairabi tuikhuah nasa taka sawi hnawma, solar energy zawk a sawi mawi avanga Pu Thena kalsantu a nih kha lo inhrechhuak thar leh se, an party-in ziaka an dah chin chauh sawia thu puarpawleng sawi tawh lo turin kan chah a ni” an ti bawk.