Mizo thlai thar, chawhmeh lam thil leh choka mamawh hrang hrang zuartu, Fam Cart-in mobile application a buatsaih chu nimin khan CH Lalmuanpuia, Addl. Director, Horticulture Dept-in a tlangzarh.
HYVE Aizawl City Hall-a tlangzarh inkhawmah thu sawiin CH Lalmuanpuia chuan, tunlai thiamna changkang zawk hmanga Mizo thlai thar lei leh zawrh chhuah Fam Cart-in an buatsaih chu Mizoram tan kailawn ropui leh thil chhinchhiahtlak tak a nih thu a sawi a. Kuthnathawktuten a tam thei ang ber an thar chhuah theih nan sorkar department-in theihtawp chhuah mah se, a hralhna chu an buaina ber niin, he mobile application kaltlanga ruahmanna siam a ni chu lawmawm a tih thu a sawi.
CH Lalmuanpuia hian Mizoramah mumal zawka thlai leh thei thar chhuahte hralhna kalpui chu a tul takzet tih sawiin, tunah hian farmer-ten hlawk zawk leh an thlai thar chhuahte mumal zawka an hralh theihna turin hma an lak mek zel thu a sawi bawk.
Fam Cart Director Lalnunpuia chuan tun lai thiamna technology mil leh data-te lakhawma Fam Cart hi kalpui an nih thu a sawi a. “Fam Cart-in a tum ber chu mipuiin thlai thar tharlam an lei theihna tur leh vegetable supply chain mumal tak siam a ni a. Tunah hian mobile app atanga bul tanin, chumi hnuah hmun hrang hrangah thlai tharlam zawrhna dawr hawn a ni,” a ti.
Fam Cart mobile application hi google playstore atanga download mai theih a ni a. He mobile app atang hian Mizo thlai thar leh thil siam chhuahte bakah, choka mamawh chi hrang hrang a man zat nena tar lan chu chah theih a ni a. Tlai dar 5 hma lama order siam tan a ni la lain an deliver thei a, tlai dar 5 hnu lam chu a tukah pek an ni ve thung ang.