Mizoram Finance & Accounts Service Association-in niminn khan Aijal Club-ah inkhawmpui vawi 27-na an hmang a, he huna khuallian, Health minister Dr R Lalthangliana’n MFAS officer-te chu department dang zawng zawngte khaikhawmtu ber an nih avangin theihtawp chhuaha hma la zel turin a chah.
MFASA Conference hawnna inkhawm, Vice President Ramchuana kaihhruaiah hian health minister chuan finance department chu Mizoram sawrkar department hrang hrang zingah a pawimawh ber leh mawhphurna sang ber nei a nih thu sawiin, Mizoram budget leh sum dang zawng zawng enkawltu an nih avangin tha taka office kal tur te, aikal lak rem lo ber department an nih avangin hriselna ngai pawimawha ram leh hnam tana thawk zel turin duhsakna a hlan.
Accounts & Treasuries Officer awm lohna district-ah pawh an neih thuai a beisei thu a sawi bawk a, Covid-19 hluar laia finance department-a thawkte inpekna chu lawmawm leh entawntlak a tih thu a sawi bawk a ni.
Conference-ah hian an pawl hmalakna report ngaihthlak a nih bakah MF&AS 2022 Batch thar lawmluhna hun hman a ni a, rorel inkhawm an neihah RBI-a training neih, sawrkar hnathawk pension scheme leh leave travel concession chungchang te an rel a, kum 2022-2023 chhunga MFASA office bearer turte an thlang bawk a ni.