BJP chuan cricketer Ravindra Jadeja-a nupui, Rivaba Jadeja, kum 2019-a an party zawmtu chu Gujarat assembly inthlan turah Jamnagar North bialah an dintir dawn.
Rorel lai hian MLA tang lai, Dharmendrasinh M Jadeja chu an hnawl a, bial 182 inthlan tura chuh tur mi 160 an puan hmasak zingah tang lai 38 an telh loh zingah a tel a ni.
Ningania candidate puan thawh khatnaah hian Congress atanga zawmtu, Hardik Patel pawh hming langin Viramgram bialah a chuh dawn a. A ruala saffron party zawmtu Congress hruaitu hlui pasarihte pawhin inthlan an chuh hlawm ang.
Tun hnaia lei chim avanga mi 130 zet an thihna, Morbi-ah bialtu MLA chu hnawlin MLA hlui tho, chhiatna thlen laia tuia zuang luta mi chhantu an dah thung.
Chief Minister Bhupendra Patel chuan Ghatlodia bial atangin a chuh ang.
Delhi-a candidate puanah hian Union Minister Bhupendra Yadav chuan MLA dintir zui lohte hi anmahni rawn chung veka tih a nih thu a sawi.
Inthlan chuh tur puan zinga bial 84 hi thawh khatnaa inthlang tur bial 89 zinga mi an ni a, December 1-ah an inthlang dawn a. Bial 76-a ding tur hi thawh hnihnaa bial 93-a inthlan tura mite niin December 5-ah an inthlang ang a. December 8-ah Himachal Pradesh inthlana vote tlate nen chhiar rual a ni ang.
Gujarat-a kum 27 zet ro rel tawh, BJP hian an hruaitu hlun tak tak an dintir tur zingah an la tel lo va, heng zingah hian chief minister hlui, Vijay Rupani pawh a tel a, ama duhthu niin party chuan an sawi.
A vawi khat nana inthlan chuh tur, Jadeja-i hi thla eng emaw zat bial lo vil tawh niin thiamna lamah mechanical engineer a ni.
Congress hlun tak, Hari Singh Solanki te nena la inlamhnai tak niin Jadeja nen hian kum 2016 khan an innei a. An chhungkua, Rajput an nihna leh lal thlah kal zel an nih avanga an lennaah a ding dawn a, Jamnagar-Saurashtra region-ah hian politics lamah a inhmang nasa hle.
Congress hminga kum 2017-a inthlan chuh, BJP zawm ta zingah inthlan chuh turah hian Pradyuman Jadeja leh Ashwin Kotwal pawh an tel.
Gujarat Congress working president thin, Patel-a hian kum 2017 khan inthlan a chuh ve lo va, hei hi kum 25 a la tlin loh vang chauh a ni.
BJP-in Gujarat inthlan tura an candidate tur an puan hi party chief, JP Nadda kaihhruaina hnuaia Nilaini tuka an party-a inthlan buaipuitute an thutkhawm tukah a ni a. Prime Minister Narendra Modi, Home Minister Amit Shah leh defence minister te pawh an tel.
Modi-a leh Shah te chawr chhuahna state-ah hian BJP hian kum 27 lai ro rel tawh mah se tun tumah hian kil thum atangin chuh a ni dawn a. Congress leh BJP chauh langsar thin kha AAP an len hnuah boruak pawh a lian zual hle.