Jerusalem-a awmte i lo inbuatsaih ang u
Zofate hi thlahtu thuhmun, kan awmna leilung luahtute avanga duh vang reng ni lova khawsakna hmun hrang ta nia sawi thin kan ni a, Aizawl hi Jerusalem atan kan hmang hlawm vek maite hian ngaihtuahna a ti thui hle. Chhiat that han tawh chiah hian hei hi a fiahin, a chiang zual thin.
Tun hnaiah kan ram thenawm Myanmar chuan buaina an tawk leh a, Democracy chho tan mek an nihna chu sipaiin hrethiam lovin an chhuhsak leh ta ni berin a lang a, kan zofa unau pui dik takte pawh sorkar na chelhtu lamah hian MP an awm ve nual avangin hren beh an ni hlawm a, an rampum buai leh a ni ber mai. An ram hmalam hun a duhawm lo chho leh tan niin a lang a, a pawi hle bawk.
Hemi kawngah hian Mizo Zirlai Pawl (MZP) te hi an fakawm thin hle mai a, kan unaute sipai sorkar in an man chungchangah pawh hian thuchhuah nei nghal vatin, Myanmar ram chu sipaiin awp lo se an duh thu an sawi a. An thuchhhuahah chuan, Myanmar sipai ten Zohnahthlak engemawzat telna, rorel lai NLD party hotute pawn chhuak thei lova siama mipui rorelna zah lova an che chu an dem thu an sawi a ni. MZP vek hian Myanmar sorkar leh Zofate tawrhna chu United Nations (UN)-ah ziaka an thlen tur thu an sawi bawk.
Zofa hmun hrang hranga awmten harsatna an tawh chiah a, MZP chetchhuah thinna hi a ropui a, zirlai pawl nimahse nationalism a an chianna leh zirlaite baka inpumkhatna tura ke an penna hi ngaihnep chi lah a ni hek lo.
Myanmar ram pawh hian eng nge an tawn chhoh zel dawn a hriat loh a, sipaiin sorkar na an chelh chho leh a nih ngat chuan khawvelin an do rawn leh ngei ang a, a tuartu chu ram mipuite tho tho an ni leh dawn. Chung zingah chuan kan tawng inang hmanpui ngeite an tel ve tih hriain, Jerusalem-a awmte hian puih leh lo chhawmdawl a, lo humhim leh duat kan ngai awm e. Hei lo hi zofaten ramdangah khawpui kan nei si lo.