South Korean police officer, Seoul khawpuia Halloween lawmnaa kalkhawmte innek buaina rapthlak tak chhuaka chhui mek chu a chenna inah thia chhar a ni a, intihlum a nih rin a ni.
Kum 55 mi, Inspector Jeong hi intelligence officer niin tual chhung police nena thawkho an ni.
Jeong-a hi mi 156 zet thihna leh mi 196 lai hliam an awmna innek buainaah khan police-in chet an lak thuai loh dan chhuinaah rinhlelh kai leh chhui bing lai mek a ni.
Nilaini khan chhuituten an chhui chhuah loh nan thup a nei tih hriat a nih avangin a hna atanga chawlh lailawktir a ni.
Jeong-a hian a Halloween lawm a nih hmaa intelligence report ziahte chu paih (delete) vek turin a thawhpuite a ti nia puh a ni a. He report atang hian chhiatna thleng palh thei hriat lawk theih a awm a, hma an la si lo nia ngaih a ni.
Tual chhung chanchinbute chuan Seoul hmar lamah Zirtawpni khan a chhungten chhun dar 12:45-ah officer ruang hi a inah an hmu niin an tar lang a. Police-in a thih chhan hi an chhui mek.
October 29 zana zan lam nawmchenna hmun, Itaewon district-a innek buaina chhuaka thite hi Halloween lama kalte an ni ber a. Covid-19 len hnua pawn lama hetianga an lawm leh theih hmasak ber a ni.
Mi thenkhat chuan kha mi zan khan mi 1,00,000 chuang an pungkhawm niin an sawi hial.
Police chuan Itaewon atang hian zan dar 6:34-ah phone call an dawng tan a, hei hi chhiatna rapthlak tak a thlen hma darkar eng emaw zat a ni.
Thuneitute chuan a hmunah khan officer 137 an awm thu leh mipuiin an tam hneh em avangin an tan chet ngaihna a awm lo niin an sawi.
He chhiatna thleng avang hian tual chhung police department leh fire service pum chu chhiatna thleng tur an ven hneh loh avang leh a thlen hnua an che chak tawk lo nia sawina chhui mek a ni.