Aizawl: Mamit district tlawhtu, Mizoram Larsap Hari Babu Khambhampati chuan specialist-te sorkara an luh duh loh avanga doctor nei lova an awm ai chuan Mizoram state pawna mi doctor-te pawh lakluh dan ngaihtuah a tul a tih thu a sawi.
Larsap chuan nimin khan Mamit District Hospital leh JNV te a tlawh a, district hospital-ah hian Medical Superintendent Dr Lalzuatliana’n lo dawngsawngin naupang lam enkawltu doctor an neih loh thu leh hmalakpui turin a lo ngen.
Larsap chuan doctor indaih lohna awm thin chu pawi a tih thu sawiin, specialist doctor thenkhat sorkara an luh duh loh avanga doctor nei lova an awm ai chuan Mizoram state pawna mi doctor-te pawh lakluh dan ngaihtuah se, doctor indaih lohna a chhawk zangkhai a rin thu medical superintendent chu a hrilh a ni.
Kambhampati chuan JNV a tlawhnaah JNV sak hna viltu engineer-te leh a sak hna thawktu contractor-te hnenah sak zawh thuai a nih theih nan chak taka hma la turin a hrilh a. Furtui tam leh kawng chhia chu an hna muan chhanah puh a fuh lo tih sawiin, Mizoram sik leh sa hrechiangtute chuan an hnathawh hun chhung leh tan lak hun turte chiang takin an hre sa vek tih a sawi.
JNV sakna atana a sum ruahman hmasak chu Rs vbc 18.05 niin ennawn hnuah Rs vbc 29.73-ah tihpun a ni a, Rs vbc 21.26 an hmang tawh a ni.
Larsap hian JNV temporary campus pawh a tlawh nghal a. Hetah hian zirlaite leh an Principal Kaizalam Tungnung ten an lo dawngsawng a, inkawmhona hun an hmang bawk.
A ṭha mang e