Aizawl : Mizoram Larsap Hari Babu Kambhampati chuan Ningani khan Mamit tlawhin Deputy Commissioner office a tlawh a, District-a sorkar hotute kawmin a hun taka hna thawh zawh a ni thin lo chu thil fel lo tak a nih thu a sawi.
Hari Babu Kambhampati chuan aspirational district pawimawh zia leh sorkar scheme hrang hrang te chu a nihna ang tak a hman anih theih nan sorkar hotute leh banker-te an theih tawp a hma la tur in a fuih a. Project thenkhatte thawh chhung a rei lutuk thin leh a thawh hun chhung pawhsei a ni fo thin chu thil fel lo tak a ni a tiin, “He’ng project te hi a hun taka zawh theih dan official ten an ngaihtuah thiam tur a ni a. Banker-te pawh scheme tha tak tak beneficiary te hrilhhriat hi an mawhphurhna an hriat thar reng a tul a ni,” a ti.
PM Ujjwala Yojana (PMUY) scheme kal meka gas connection neih theih chungchang te hria an tlem bakah diltu an tlem chhan chu mipuiin an hmelhriat that tawk loh vang nia sawiin larsap hian, gas distributor te leh sorkar official-te an tan a ngai hle niin a sawi a. Central sorkar hnuaia scheme tha tak tak, Mizoram mipuite hamthatna tura scheme awm mek te – Pradhan Mantri Suraksha Bima Yojana (PMSBY), Pradhan Mantri Jeevan Jyoti Bima Yojana(PMJJBY), etc,. te mipuiin an hriatchian a ngaih thu a sawi bawk.
Larsap chuan zirna kawngah Mamit District chu tan an lak zual a ngai a; Mizoram pum ang pawhin tan lak a ngai hle a. Education-ah district dang te ai a hnufual bik a nih avangin education lama hotu te chu an theih tawp a hma la turin a hrilh.
He inkawmnaah hian Mamit bialtu MLA H Lalzirliana pawhin thu a sawi a. Mamit Bawrsap Lalnunhlua leh Mamit SP Lalthangpuii Pulamte te an tel a. An inkawm hnu hian Larsap-in Kohhran hruaitute, NGO hrang hrang hruaitute, Political Party hrang hrang hotute leh MJA Mamit member te nen a hran theuhin a kawm chhunzawm leh bawk.
Larsap hian Mamit district tlawha ni hnih cham turin Ningani chawhnu khan Mamit a thleng a ni.