Aizawl district chhungah thosi atanga kai theih dengue vei an pung zel a, tun hnaia hri kai tharte chu enkawl dam har chi, Dengue Hemorrhagic Fever (DHF) kai an ni tana ngaih a ni.
Dengue-ah hian chi hnih – a na vak lo, enkawl dam awlsam, Dengue Fever (DF) leh enkawl dam har, thihpui hial theih, Dengue Hemorrhagic Fever (DHF) a awm a. Mizorama hri leng chu a na lo zawk, DF nia ngaih thin a nih laiin tun hnai kai tharte erawhin DHF an kai niin health department hotuten an ngai.
Health department Joint Director (Malaria) Dr. Hmingthanmawii chuan, “Tun hnaia hri kai tharte hian DHF hi an kai chho tanin a lang a; mahse, a finfiahna tak erawh a awm lo,” a ti a, hemi avang hian he natna kai lo tura fimkhur chu a tul tak meuh meuh tih The Zozam Times a hrilh.
Tun hnaia dengue leng mek chu a ram pum huap anga sawi theih a ni lo a, hri hluarna ber chu Aizawl a nih thu Dr. Hmingthanmawii chuan a sawi a, “District dangah hi chuan kai hi an tam vak lo, Aizawl ber mai hi a bupui chu a ni,” a ti.
Dengue vei an chhinchhiahna atanga a lan danin, October thla chhung khan mi 1,070 endik atangin dengue kai mi 565 hmuhchhuah awmin, chung zinga za zela 92.03 lai chu Aizawl district chhunga mi an ni.
Kumin January atanga October thla chhung dengue vei hmuh chhuah tawh zawng zawng chu 859 a ni a, an zinga za zela 89.98 lai chu Aizawl district chhunga mi an ni bawk.
Dengue natna vei hi Mizoram sorkara health department chuan kum 2012 vel atang khan a chhinchhiah a, he natna avanga thi awm kum chu kumin October thla kha a ni a, nunna chân mi pahnihte chu Aizawl district chhunga mi an ni.
Dengue natna hi vei thar an awm deuh reng a, sorkarin a kai zat a chhinchhiah hi sorkar enkawl laboratory leh Genesis Laboratory-a Elisa khawl atanga hmuh chhuahte a ni a, Rapid test hmanga hmuh chhuah an awm teuh bawk.