Aizawl : NHIDCL in four lane an laih turah Mizoram chhung hmun thenkhat, Assam NHIDCL enkawlna hnuaia package an dah leh Vairengte leh a chhehvela kuhva kudam te chu Pathianni khan MJA Kolasib District hruaitute’n an tlawh.
MJA hruaitute’n ram neitu Vairengte mi thenkhat an biaknaah, Assam NHIDCL hnuaia an awm chu an duh loh thu an sawi a, an harsatna hi district hotute hnenah thlen tawh mah se, zangnadawmna lak chungchangah harsatna a awm ve dawn loh thu an lo hrilh niin an sawi.
Kawng laih tur package then dan hi pawl leh political party thenkhat pawhin an duh loh thu leh Mizoram sah hekna a nih thu sawiin, sorkar chu package then tidanglam tur hian an lo nawr tawh thin niin an sawi bawk.
Four lane laih turah hian NHIDCL Assam enkawlna hnuaiah package 1&2 a awm a, package 3 atangin NHIDCL Mizoram te’n an enkawl thung a, package 2 leh 3 inthenna hi Vairengte police gate bul niin a thlang lamah hian Vairengte-a cheng mek chhungkaw 30 chuang an la awm a, hei bakah kawngpui tharin a paltlang turah hian huan lo ram nei leh chhungkaw 20 chuang an awm mek bawk.
Thuneitute sawi danin, heng mite zangnadawmna lak tur hi pawisa a awm hunah Assam CALA kut atangin Kolasib district CALA kutah hlan a ni ang a, anni hian huan lo ram neitute hnenah an hlan chhawng ve leh dawn a ni.
Kolasib district MJA hian zirchian a tul thu leh package then dan tidanglam tura Mizoram Larsap hnenah thlen an lo rel tawh a, tunah ramri-ah buaina thar awm lo mah se, nakin zelah harsatna chawk chhuak theitu tur nia an hriat thu an sawi tawh bakah, zangnadawmna pawh Assam NHIDCL atanga an lak chuan Mizoram leilung a nihna bo ta anga ngaihtheih a nihna chen a awm niin an sawi.
Thudawn danin, tun hma deuh khan Mizoram PWD chuan Lailapur khaw chhung thleng kawng siam leh enkawl chu an kutah a awm thin a, Lailapur mi thenkhatin Assam sorkar an nawr hnuah Lailapur Mandir bul thleng Mizoram PWD te’n an enkawl leh tawh a, NHIDCL package then anga kaltlang pui anih chuan ramriah harsatna ala thlen theia a lan avangin MJA, Kolasib district in an tlawh a ni.
Kolasib District MJA te hian Vairengte leh a chhehvela kuhva kudamte an tlawh nghal a; an tlawh lai hian Lalhmingliani (Seni), Vairengte, Zalen Veng kudamah phai lam pan tur kuhva phur truck lian pahnih; kuhva bag thahnem tak load vek tawh an hmu a, hei bakah hian Ningania Vairengte Police checkgate a kuhva ro bag 7 an man chungchangah pawh Vairengte Police Station-ah an zawt fiah nghal bawk.
Kolasib District Magistrate-in November 9, 2022-a kuhva phalna nei lo a phurh leh hralh khapna thupek a chhuah chung hian, a rukin kuhva sumdawnna hi mi thenkhatin an kalpui reng ni a hriat a ni.