Aizawl : Mizorama thalai leh naupangte ruihhlo laka venhimna thawktu pawl, Foundation For Drug-Free Mizoram chuan Inrinni khan Synod Conference Center-ah an pawl inkhawmpui lian High Council an hmang a, I&PR Minister Lalruatkima’n a hmanpui.
Minister Lalruatkima chuan, ruihhlo dona kawngah chhungkua an pawimawh ber tih sawiin, “Chhungkua atanga bul kan tan that a, zirtirna dik kan pek a, chu chu sikul leh Sunday sikul lamah zirtirna pek chhunzawm an nih chuan ruihhlo lakah hian kan tu leh fate kan venghim thei dawn a ni,” a ti.
Mizoramah hian ruihhlo ngaite enkawlna tur hmun a awm avang hian mipuite hi an inthlahdah deuh thin nia a lan thu a sawi a. “Ruihhlo ngaite hi kan hnam puite, kan thisen zawmpuite an nih avangin hmangaih tak leh duat taka theihtawp chhuah kan enkawl an mamawh tak zet a ni,” a ti bawk.
Lalruatkima hian, Mizoram hi ruihhlo tamna tih thin ni mah se, mi tha leh fel tak tak, kohhran leh khawtlang tana theihtawp chhuah a, an thiamna leh finna hmang tam tak an awm tih sawiin, ramin thatna lai a neihte hi sawi tam a hun tawh thu leh, mi tha leh fel te chu ngaihsan an nih theihna tura inzirtir pawh a tul hle niin a sawi.
“Social media kan hmang nasa a, a bik takin thalaiten a tha lam aiin a chhe zawng atan an hmang uar niin a lang a, hei hian kan ‘moral value’ tam takin a tichhe mek niin a hriat,” tiin Minister chuan, social media hmanna kawngah pawh zirtirna tha neih zel a tul thu a sawi.
An pawl dintu V Lalnunthara (Mathara) kaihhruai High Council-ah hian kalkawmte’n, “Mizoram sorkarin ruihhlo dona kawnga hma a lakna kan thlawp a, tun aia nasain zirna in leh sunday sikulah inzirtir ni rawh se’ tiin resolution an siam a ni.