Mizoram People’s Forum Annual General Meeting vawi 15-na chu nimin khan Vanapa Hall-ah neih a ni a, thupuiah ‘2023 MLA inthlan atana inbuatsaihna’ tih an hmang.
Inkhawm kaihruaitu, MPF President, Rev Dr Vanlalnghaka Ralte chuan MPF chu Mizorama inthlan dik leh fel taka kalpui a ni theihna atan leh ram rorelna tha tak a awm theihna atana Kohhran hote leh tlawmngai pawlte tanhona huang a nih thu leh an hmalaknate chu state dangte pawhin tha an ti hle tih a sawi a, huaisen taka Zoram chhe mek siam thaa mite kawng dik kawh hmuhtu nih a pawihmawh thu te, Zoram nuam, tha leh duhawm siama Pathian ropui nana thawk zel turin Pathian chakna rinchhanin huaisen taka hma lakpuiah kalkhawmte a sawm.
MPF Annual General Meeting chawhma hunah MPF vice president, Central YMA president ni bawk, R Lalngheta chuan ‘Kum 2023 general election atana hmalak dan tur’ tih thupui hmangin thuchah a sawi a, chawhnu hunah Rev MS Danwgliana’n ‘Party ruihchilhnain ram leh mipui a nghawng dan’ tih thupui hmangin thuchah a sawi bawk.
General Secretary Rev Lalramliana Pachuau chuan MPF hmalakna hrang hrang report pe a, Finance Secretary Vanlalthanga’n sum an hman dan report a pe a, Treasurer Lalliani’n kum 2023 atanga 2024 chhunga an budget tur pharhin an pawm bakah an hmalakna tur hrang hrangte an rel bawk a ni.