ePoS hmanga buhfai sem a buaithlak!
Sorkar laipui chuan ration card hmanga buhfai leh thildang an sem dan thlakin, Electronic Point of Sale (ePoS) khawl hmangin nikum atang khan buhfai pawh an semchhuahtir a, a awlsamna kawngah chuan a awlsam phah khawp mai. Mizoramah pawh hman ve nghal niin, he buhfai sem dan thar tia sawi mai hmang hian ration card a hming chuang, aadhar nena thlunzawm tawh tuemaw ber khan a kutzungpui a nem a, kan la thei ta kha a ni a, covid-19 hri leng vangin theih loh zeuh chang erawh kan nei tih kan hre awm e.
Tunah hian boruak a zia deuhah ngaiin Mizoramah pawh ePoS khawl hmang hian buhfai semchhuah leh tan a ni a, kan ramah chuan Jio data nena thlunzawm a nih avangin internet muang vanga harsatna sawi tur a awm leh nual ta mai. A chak loh chu thuhran, ration card a hming chuang ngeite zingah pawh an kutthla hmuh theih loh vekte pawh an awm thei!
Mizoram hi central thuzawm hma tak mai kan ni a, state in a duh dana a kalpui ve theih reng pawh hi i-he lova zawm mai hnam kan ni a, buhfai sem danah pawh hian kan zawm tha viau mai a, mah se a tuartu chu mipui tho kan ni. Kuthnathawktu tam zawkin an tuar nasa lehzual!
Retailer thenkhat chuan he khawl hmanga buhfai sem hian harsatna tam tak a thlen tih an sawi a, Aadhar card link tho si, ePoS-in a hmuh theih loh vanga buhfai la thei lo an awm thin tih sawiin, “Kuthnathawk thenkhat ho phei chu khawl hian a hmu tha thei vak thin lo,” an ti a, an hun heh turzia leh hun tha an khawhral nasat dan tur lam chhutpui an ni tawh ngai lo.
He kalphung hi i-he lova kan la zawm zel dawn a nih chuan sorkar hian ngaihtuahna thar hmanga awlsam zawk leh hun heh lo zawka buhfai sem dan tur an ruahman lo a nih chuan kan buai kumtluan leh ngeiin a rinawm a ni.