Lalhruaitluanga Chawngte “Sikpui leh Sulhnu”

  • Aremruati Ngente

Thuziak mi tam zawk in an tum ber chu, mi zawng zawng huap thei, mi tam zawkin an inngaihbel a, an nuna an seng luh theih thu ziah a ni a. Engtik hunah pawh ngaihnawm thei thu ziak hi literary critic tam takin thuziak tha tehfung atana an hman a ni fo bawk.’Sikpui leh Sulhnu’ erawh hi chu hunpui rei lo tak, a hmang nuam inti apiangin mitkhapkar leka thlah liam ni a an inhriat thin, kristian te hunpui krismas leh a chhehvel nun ram seprawtuina thuziak dahkhawm a ni a, chutah pawh Mizo te chauhin an lungenpui phak tur zawnga her rem a la ni leh zel bawk a. Mizoram lehkhabu market han ngaihtuah chuan, mi nawlpuiin lehkhabu dawr ai a thawmhnaw leh eitur tuihnai zawrhna dawr an pan zawk laia hetiang lehkhabu lo tih chhuah hi a huaisenthlak ang reng viau mai, chutih rual chuan, he lehkhabu ziaktu hian hlawkna um a ziak a ni lohzia a tarlag tel nghalin ka hria a, chu chu a thuhmatheha “Zoram thlasik ka nghahhlelhzia chu hria la, a chhung thu lam leh a quality lam i ngaihtuah bik lo ang”(x) a tih hian a nemnghet a ni.

He lehkhabuah hian ‘thuhma’ leh ‘thuhmatheh’ tel lovin thuziak 18 dah a ni a. A hmasa pahnih ‘Hnutiang leh hmatiang’ tih leh ‘An hril thiam lo, an puang zo lo’ tih loh thuziak dang zawng hi“Kum sul liam hnu 1, 2, 3..” tiin 16na thlenga rem a ni deuh tawp mai a, mawlmang taka a thupui thlan khawm hmanga titi lunglenthlak leh ngaihtuah tithui zet a dah khawm kara a thuchah erawh ngun taka ngaihtuah zui ngai chi a ni.

Kum sul liam hnu han tih chuan hun kal tawh sawina a ni mai a, a tobul chhuia ropui taka han hrilhfiah chiam tur pawh a awm chuang lo. Mahse, he lehkhabu ziaktuin tlar hnih lek tal pawh ama irawm chhuak atana a awh em em(x) C.Lalkhawliana’n lunglenthlak taka Zoram krismas boruak tarlan nana a lo hman tawhna hla pakhat avangin, “Kum sul liam hnu” phenah hian Mizote thinlungah chuan hlimna, phurna, lunglenna leh khawharna, thil inkawkalh leh inkawlkalh tak, sawifiah hleih theih si lohin a inphuarkhawm tlat tawh a. Thlasik boruak ang deuha a chhiartute timura tham nghal chat tur thupui, he lehkhabu ziaktu hian a thlang thiam chat chat hle a ni.

A chhung thu han keu han keu hian “Hruaitea Thlasik/Krismas Diary” tih mai tur chi a ni a. A ziah hun, a thuhma lama a tarlan dan chuan 2014 atanga 2022 inkar, krismas dawn chauh ni lo, nipui lai leh fur laia a ziah te a ni hlawm thung. Chung a duhthusam, a nuna a thil tawn leh a lunglennain a chhungril a khawih dan a puanchhuahna karah chuan mawi takin Mizo khawtlang nun leh thlasik boruak a rawn chawm pawlh a. Thawnthu ngaihnawm leh rilru khawih tak tak a rawn tarlan te hi kan chanchin a ziahna ni miah lo mah se, chutah chuan kan tel ve a. Patea’n a boruaka cheng tak tak chunga Puanvawrh tlang a hmu Bethlehem tlang deuh tlat ang khan, a thlasik khawvelin a chhawpchhuah sak nun thawnthu kan krismas khawvel atana min rawn chhawpchhuahsak hian a boruakah min hruai lut tlat a ni.

Mi thenkhat chuan hna zahawm leh sang neih te, building ropui tak te, miten an chung en leh an zah nih te, mi hriathlawh leh mi hmingthang nih te an duhthusam hmasaah an dah thin a. Hruaitea duhthusam erawh chu, “Zan mu han harh ila- ral lehlamah tute emaw lo zai tuar tuar se, tui em emin. Chumi ep lam atang chuan paho zai thâwm lo ri se, “Chumi zan reh takah chuan…” tia tui em ema zai ri te, “Bethlehem mual tlai tla engah…” tih ri te,…”Chungnung berah ropui rawh se” an rawn tih vau vau ri te, chutiang thawm chu inpawlh nawk nawk se…zan muttui laia kan harhin chutiang thawm chu hria ila, kil hrang hrangah lo zai se. Vawt tia tawm vial chung leh inkhuh tha sauh sauh chungin mu ila…”(15, 16) tih hi a ni.

Chu a duhthusam khawvel, a la tawn ngai loh emaw a tawn phak loh khawvel anih avanga a duhthusam ni lo. A tak ram ngei a a tawn a, a lo dai hriat tawh, hun inherin a tem nawn phak loha a her liampui tak thlir chung chuan, kum sul liam hnu a chhuilet a. Thlasik leilungah chuan mawina hmuin, khawvel hausakna sum leh pai tel miah loa lungawina khawp nun thawnthu ngaihnawm chhar mah se, thlasik boruakin a ken tel “hnutiang leh hmatiang”(1) thlirna tarmit inkawp rial chuan a chhungrilah a luh tlat ni ngei tur a ni, “hnutiang leh hmatiang” essay-ah chuan, “Kan lunglentu hun kal tain min uai a, tih fuh loh tum phei chuan a vihin min vit thin. Chutih rualin kan nghahhlelh, kan hma lama miin min pawt bawk si. Lunglen leh nghahhlelh a ruala a awm a, hnutiang leh hmatiang an han intawh meuh chuan mihring tan awm mai mai theih a ni lo”(4) a rawn ti hial a ni. He thu a ziah lai hi chuan awm ngaihna a hriat loh tak tak ka ring.

Mizote krismas hmannain ziak loh dan ang deuha a ken tel tlat chu zaikhawm/lenkhawm hi a ni a, chu chuan he lehkhabuah pawh hian hmun a luah hnem hle. Hun danga mihringin a tawn phak loh krismas zaikhawm boruak nuam dangdai lutuk ai a hmasawnna khawvelin lawm leh buaipui tur dang tam tak a chhawpchhuahsak tak tunlai mi leh zual te tan chuan, he lehkhabua thawnthu chuang te hi din chawp liau liau emaw tih mai a awl tawh mai thei a. Mahse, hetah hian Mizote krismas leh thlasik boruak tak tak a innghat a, hnam dangte chuan a ropui thei ang berin lo lawm ve luih luih mah se, an tawn phak ve phak ngai loh tur krismas khawvel chu he lehkhabu ina a rawn tarlan krismas hi a ni.

Kan naupan laia kan hla ngaihthlak than deuh emaw, thenawm ten an play tuktin ziah hla emaw pawh ni se, chu chuan a chhehvel nun nen keimahniah hian inzawmna a lo nei thin a. A hla thu nena inkungkaihna nei reng reng lo pawh ni se, kan bengin a hriat than rimawi chuan a hunlaia kan nun kha mitthlaah a rawn chhawpchhuak tel thin. Chutiang bawk chuan kohhran zaikhawmnaa kan hla sak than deuh te, zaipawl hla sak thin te, krismas carol naa nula leh tlangval hla leklam than deuhte chuan anmahni kha kan mitthlaah a rawn chhawm tel nghal a, khatih laia kan khawsak dan mawlmang ber thleng khan inzawmna thuk tak an lo nei hman tawh thin.

He lehkhabu ziaktu hian Mizo krismas hla mawi tak tak te kha, a thuziak chhiartute tana chhawpchhuah paha thawnthu ngaihnawm fun tel nge a tum ang a, chung krismas thawnthu ngaihnawm hrang hrang karah chuan a cheimawitu atana hla rawn zeh hi a tum zawk ni ang? tih hi ngaihtuah tham tak a ni a. Mahse, vawi tam tak ka chhiar chhuah hnua ka rilrua awm ta chu, chung zawng zawng chu Hruaitea khawvelah hian a kalkawp tlat a, lak hran theih a ni lo tih hi a ni.

Zaikhawmnaa a bu pawh en hran loa Nu Zopari lo alto al al te, a piah deuha Pu Ramtiama lo tenor vau vau thin te, a ngai tea U Val’tluanga bass thum dap dap ri kara Pi Liankimi te, Pi Siami te, Pi Tlangnawni te, Nl.Remsiami te lo lam darh darh kara Pu Khawpuimawia’n ding chunga kut a lo beng dap dap ri te chu a khawvel a ni a. Ber thla a lo thlen chang apianga zan awl remchanga a pain a sawmkhawm a thiante nen, khuang leh tingtang nena chhandamtu pian thu an puanna rimawi te chu a khawvela bet tlat an ni.

Chutiang tho chuan, thlasik a lo thleng a, ralkhata tlaizawng par han hmuh ringawt pawha rilrua Bethlehem lo lang ruih mai te, Sap tarzan leh vai tarzan enkawp tawh bik nihna ten hmun chungnung an luahna te, bruce lee leh bruce lai ten an thinlunga hmun pawimawh ber an channa te, urlawk zana naupang tlaivar tum insawiphur rilru thianghlim tak si a an inhnial bap bap te, krismas tuka an duhzawng hre fuh chat chat thintu krismas putar thilpekin an thinlunga lungawina a rawn chhun liam bawrh bawrhna te, thawmhnaw thar rim nam veng veng kara krismas boruakin Biak In tuala lawmna sawifiah hleih theih loh a pek zawng zawng te chu a khawvel tifamkimtu an ni.

Chutah chuan a thinlunga nun thawnthu ngaihnawm ber ber a inphum a, chutah chuan a hlimna leh a lungawina te, a lunglenna leh a khawharna tawpkhawk thlengin a inphuarkhawm a, kum sul liam hnu, a mitthlaa liam ve thei si lote chuan he lehkhabu hi an rawn tur chhuak ta ni berin a lang. He lehkhabu chhunga thuziak 18 te hi essay huang chhunga dah theih, atir atanga a tawp thlenga thawnthu ngaihnawm tak inphan chiat si a ni deuh ber a. Krismas leh a chhehvel nun lunglenthlak leh ngaihawm tak kara Mizo hnam ziarang ngaihnawm taka a inzam chhuak chiat hi he lehkhabu hlutna tizualtu a ni.

50’s leh 60’s chho vela hlaphuahthiam Rokunga leh a pawl ten zoram sikpui awi a zanrei pawh nei hlei thei lo va Petromax nen Aizawl khawpui zaia an suartluan dan chanchin ngaihnawm tak te(9-13), Mizo krismas hla mawi tak tak ten Mizo kristiante thinlunga hmun a chan dan thawnthu ngaihnawm tak tak karlaka a rawn zeh te, Pu Khawpuimawia nun awhawm lem lo ang taka lang phena nun hlu leh awmawh ber inphum te, chung thawnthu chi hrang hrang ngaihtuah tithui leh thin dek tak kara he lehkhabu ziaktuin Thandanga ‘Bethlehem i pan ang’ neitu nihna a pek tawp Pi Zachhingi leh a pasal Pu Tuaka te nupa chanchin lungchhiatthlak tak sawi chhawng chunga mihring nun a hrilhfiam dan te hi, sep chiama fiah chi a ni lo, uluk taka chhiar a, ngaihtuah zui neuh neuh a, thinlung lama fiah chi a ni.

Mi tam zawkin thlasik hunpui inher vel meilum ai chunga movie en nan leh mahni ngaihnawm tih zawng lehkhabu chhiar nan te, kumtluana hunbi min chhiarpuitu mahni hna theuh dahtha a rilru zalen taka chhungkua leh thianho inkawm khawm nan te, mahni duh zawng leh awh zawng lam khawm na te, chhungkhat laina mual liam tawhte sulhnu chhuikir a lungchhiat thar lehna hun atan te a kan hman laiin, ngawi renga “Sikpui leh Sulhnu” chhuia nun lo tehtu erawh chuan hnampui zawkte tihdan entawna kan hmanhlelh hmaa “Mizo Kristiante Krismas” hman danah khan changkanna a hmu a, chutah chuan nun thawnthu ngaihnawm ber a chhar a. He lehlkhabua a ziaktu lunglenna funkhawm kara mittui leh mitthla inluanpawlh kara thawnthu ngaihnawm tak takte khaikhawmtu chu mi zawng zawng huapzo Isua hnungzui tura beiseina leh duhthusam a ni.

He lehkhabua “Lal pian hun pangpar” tlangsam leh nihawi vul chiat kara naupang rilru thianghlimte duhthusam thangkhawk ri leh, mihring nun chawhnu lam khawvel atanga tlawm taka lal thar lo piang lawmtute fakna rimawi karah hian nun I hmu ang a. A ziaktupa thlasik khawvel leh sulhnu lunglenthlak tak karah hian i thinlungah Mizo hnam leh zoram thlasik kara krismas hman hlut bikna a thar ve ngeiin ka ring.

Zan a thlakhlelhawm sawt a, chhun a nghahhlelhawm sawt bawk. |ingtang ri a mawi zual a, naupang nui rite pawh a mawi zual thin. Rualduh an ngaihawm zual a, hmelhriatloh thlengin an hlu zual thin. Zoram thlasik hi chu a mak a ni…”(v)

Leave a Reply

Your email address will not be published. Required fields are marked *

error: Content is protected !!